काठमाडौं, ७ मंसिर । राज कटुवाललाई आम मानिसहरूले नायक तथा मोडलको रुपमा चिन्छन् । अझ, उनले अभिनय गरेको ‘मेसो मिलाएर’ बोलको गीत हिट भएपछि त उनको चर्चा पनि चुलिएको छ । उनी म्युजिक भिडियोमा व्यस्त पनि देखिन थालेका छन् । ‘मेसो मिलाएर’ गीत हिट भएसँगै राज र अर्जुनबीच पुनः सहकार्य हुने भएको छ । अर्जुनको कम्पनी द डिभाइन म्युजिकले तयार पार्ने ५ वटा भिडियोमा राजले काम गर्नेगरि सम्झौता भएको छ ।
सम्झौता पत्रमा हस्ताक्षर गर्दै दुबैले उत्साह व्यक्त गरेका छन् । डिभाइनको भिडियोमा काम गर्न पाउँदा आफू उत्साहित भएको राजले बताए । यस्तै, संगीतकार पोखरेलले ‘मेसो मिलाएर’ गीत हिट भएपछि राजलाई दर्शकले अत्यधिक खोजेकाले आफूले ५ वटा भिडियोका लागि संझौता गरेको बताए । राजले निर्माण गरिरहेको फिल्म ‘मायाबी’को हाल छायांकन भइरहेको छ । राज आफै नायक बनेर नयाँ फिल्ममा काम गर्ने तयारीमा समेत छन् ।
