काठमाडौं, २१ पुस । नेपाली कांग्रेसले सर्लाहीको बरहथवामा एक जना युवाको ज्यान जाने गरी भएको घटनाको सत्य–तथ्य छानविनको माग गरेको छ । आज (शनिबार) विज्ञप्ति जारी गर्दै कांग्रेसले घटनाको सत्य–तथ्य अध्ययन गरी यथार्थ छानविनको माग गरेको हो । त्यसैगरी, कांग्रेसले घटनामा घाइते भएकाहरुको उपचार र प्रदर्शनकारीले उठाएका विषयमा गम्भीर बन्न सरकारसँग माग गरेको छ ।
साथै, कांग्रेसले आफ्ना अधिकारको विषयलाई उठान गर्दा शान्तिपूर्ण, मर्यादित र हिंसारहित उपाय अवलम्वन गर्न प्रदर्शनकारीलाई आग्रहसमेत गरेको छ । सुरक्षा निकाय र सरोकारवाला पक्षलाई संयमित रहनसमेत कांग्रेसले अपिल गरेको छ ।
