काठमाडौं, २२ पुस । राष्ट्रियसभा सदस्य निर्वाचनका लागि सत्तारुढ गठबन्धन दलले भागबण्डा टुङ्ग्याएको छ । प्रधानमन्त्रीको सरकारी निवास बालुवाटारमा आज (आइतबार) बसेको बैठकले राष्ट्रिय सभा निर्वाचनका लागि भागबण्डा टुंग्याएको हो ।
सत्ता गठबन्धन दलको बैठकले नेकपा (माओवादी केन्द्र) लाई राष्ट्रिय सभामा ६ सिट दिएको छ । राष्ट्रिय सभामा रिक्त हुने २० सिटमध्ये १९ सिटका लागि निर्वाचन हुँदैछ । जसमा माओवादीले ६ सिट पाएको हो । बैठकमा प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा एकीकृत समाजवादी पार्टीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवसहित चार दलका नेताहरू सहभागी थिए ।
त्यस्तै, सत्तारुढ दलमा नेपाली कांग्रेसले १० सिट, नेकपा (एकीकृत समाजवादी) ले २ सिट र जनता समाजवादी पार्टीले १ सिट पाएको छ ।
आगामी माघ ११ मा हुने राष्ट्रिय सभा निर्वाचनका लागि सातै प्रदेशमा भोलि उम्मेदवारी दर्ता गर्ने कार्यतालिका छ ।
