काठमाडौं, वैशाख २० । धादिङको थाक्रे गाउँपालिका–५ गैरीखर्कस्थित एक घरमा आगलागी हुँदा एक दम्पतीको मृत्यु भएको छ। आगलागीबाट स्थानीय ७४ वर्षका तेजबहादुर लामा र ७४ वर्षकै श्रीमती ठूली लामाको जलेर मृत्यु भएको हो ।
उनीहरु घरमा एक्लै बस्ने गरेको र राति सवा १० बजे घरमा आगलागी भएको जनाइएको छ। विद्युत् सर्ट भएर घरमा आगलागी भएको हुन सक्ने प्रहरीको अनुमान छ ।
तीन छोरा र तीन छोरी रहेका तामाङ दम्पतीमात्रै घरमा बस्थे। लमजुङमा रहेका दुई छोरा र काठमाडौंमा रहेका अर्का छोरा गएराति नै घटनास्थल पुगेका छन्। आगलागीबाट घर पूर्ण रूपमा जलेको छ।
