काठमाडौं, २७ जेठ । राष्ट्रिय स्वतन्त्र पार्टीले दोस्रो स्थापना दिवसमा विभिन्न कार्यक्रम आयोजना गरी मनाउने भएको छ । रास्वपाका सहमहामन्त्री एवं संगठन विभाग प्रमुख कविन्द्र बुर्लाकोटीले दोस्रो स्थापना दिवसको अवसरमा असार १ देखि असार ७ गतेसम्म वडादेखि केन्द्रसम्म विभिन्न कार्यक्रमहरु आयोजना गरिने बताए ।
रास्वपाले स्थापना दिवसको कार्यक्रममा केन्द्रीय समिति, विभाग, प्रदेश समिति, विभागका पदाधिकारी र सदस्यहरुलाई जिल्ला र पालिकामा पुगेर कार्यक्रम आयोजना गर्न निर्देशन गरेको छ । त्यस्तै, आवश्यक छलफल, सहयोग र समन्वय गरी कार्यक्रम सफल बनाउन पहल कदमी लिन पनि भनिएको छ । रास्वपाले भौतिक रुपमा उपस्थित हुन नसक्ने सदस्यले अन्य माध्यमबाट समेत आफ्नो भुमिका निर्वाह गर्न आग्रह गरेको छ ।
पार्टी स्थापना दिवस असार १ गतेदेखि हालसालै निर्माण सम्पन्न र निर्माणाधीन भौतिक पूर्वाधारका योजनाहरुको अनुगमन कार्यक्रम आयोजना गरिएको छ । त्यस्तै, असार ३ गते पत्रकारहरुलाई कार्यक्रमबारे जानकारी गराउने, ५ गते रक्तदान कार्यक्रम, सार्वजनिक स्थलहरुको सरसफाई, ६ गते वृक्षारोपण, ७ गते चियापानलगायतको कार्यक्रम आयोजना गरिएको छ ।
