काठमाडौं, १२ असार । अन्तर्राष्ट्रिय पर्वत समाजले पर्वत जिल्ला अस्पतालका लागि आर्थिक सहयोग जुटाउने ृउद्देश्यले बेल्जियमको लुभेन शहरमा च्यारिटि डिनर तथा विविध साँस्कृतिक कार्यक्रम सम्पन्न गरेको छ ।
जिल्ला अस्पतालमा बिरामी कुरुवालाई आवस्यक सामाग्री सहयोग गर्ने र संस्थाद्वारा संचालित परोपकारी कामका लागि आवश्यक आर्थिक श्रोत संकलन गर्न गत सोमबार कार्यक्रम भएको हो ।
च्यारिटी डिनर एवं सांस्कृतिक साँझमा लोक गायक बिष्णु क्षेत्री, सुमी घिमिरे सापकोटा र जीत तिलिजा मगरले प्रस्तुति दिएर मनोरञ्जन प्रदान गरेका थिए भने स्थानीय कलाकारहरुले नृत्य प्रस्तुत गरेका थिए ।
उक्त कार्यक्रमका लागि करिब ५४ लाख नेपाली रुयैयाँ संकलन भएकोमा कार्यक्रमको खर्च कटाएर बाँकी रकम संस्थाले परोपकारी काममा सहयोग गर्ने आर्थिक सहयोग संयोजक कृष्ण तिवारीले जानकारी गराए ।
बेनेलक्स एवं युरोपियन युनियनका लागि नेपाली राजदूत गेहेन्द्र राजभण्डारी, लुभेन नगरपालिकाका मेयर मोहम्मद रिदवानी र अन्तर्राष्ट्रीय पर्वत समाजका अध्यक्ष गुणराज शर्माद्धारा संयुक्त रुपमा पानसमा दीप प्रज्वलन गरि कार्यक्रमको उद्घाटन गरिएको थियो ।
कार्यक्रमका प्रमुख अतिथि राजदूत राजभण्डारीले नेपालमा गरिने परोपकारी कामका लागि परदेशबाट नेपालीहरुले गरेको सहयोगका लागि गरेको प्रतिबद्धताको प्रशंसा गर्दै आगामी दिनमा पनि यस्ता कार्यहरुलाई निरन्तरता दिनुपर्ने बताए ।
बेल्जियमको लुभेन नगरपालिकाका मेयर रुदवानीले बेल्जियमको लुभेन शहरमा धेरै देशका मानिसको बसोबास रहेकोमा नेपालीहरुको पहिचान, आर्थिक र सामाजिक योगदान विशेष रहेको बताए ।
मेयर रुदवानीले लुभेनमा बसोबास गर्ने नेपालीहरुको आपसी सहयोग, सद्भाव र ऐक्यबद्धता प्रभावित भएर लुभेन नगरपालिका र नेपालको कुनै एक नगरपालिकाबिच भविष्यमा आपसी सहयोग आदान प्रदानका लागि आफूले काम गर्न चाहेको बताउँदै, आफू नेपालको भ्रमण गर्न उत्सुक रहेको बताए ।
कार्यक्रमको सफलता र अन्तरराष्ट्रिय पर्बत समाजको परोपकारी अभियानको प्रगतिको कामना गर्दै अन्तर्राष्ट्रिय पर्वत समाजका संस्थापक अध्यक्ष पुरन गिरी, चार भन्ज्याङ तमु समाज युकेका अध्यक्ष बेनकुमार गुरुङ, अन्तर्राष्ट्रय चार भन्ज्याङ तमु समाजका अध्यक्ष रिटायर्ड लेफ्टिनेन्ट चन्द्रबहादुर गुरुङ, तमु धिं युकेका अध्यक्ष हरी गुरुङ, गैरआवासीय नेपाली संघ बेल्जियमकी अध्यक्ष सीता सापकोटा, संघका पूर्व अध्यक्ष गंगाधर गौतम, पूर्व केन्द्रीय उपाध्यक्ष नारायण आचार्य, समाजका बरिष्ठ उपाध्यक्ष दधि आचार्य, संरक्षक सुरेन्द्र भुषाल, दुर्गाप्रसाद श्रेष्ठ, समाजका सल्लाहकार मनोहरी शर्मा (ठाकुर), लाल गुरुङलगायतले शुभकामना व्यक्त गरेका थिए ।
कार्यक्रमको शुरुवातमा स–साना नानीहरुद्धारा स्वागत नृत्य प्रस्तुत गरेर सुरु भएको कार्यक्रममा उपस्थित अतिथिहरुलाई स्वागत समाजका प्रमुख संरक्षक झलक केसीले र धन्यवाद ज्ञापन खड्गबहादुर केसीले गरेका थिए ।
सहयोगी दाताहरुलाई मायाको चिनो र प्रशंशा पत्र दिँदै सम्मान गरिएको थियो । कार्यक्रमको सञ्चालन समाजका महासचिव प्रकाश पौडेल र सांस्कृतिक कार्यक्रमको संचालन सचिव दिपक न्यौपानेले गरेका थिए ।समाजका सचिव लामिछानेले कार्यक्रमको डिजितल ब्यवस्थापन र प्रसारण गरेका थिए ।
च्यारिटी डिनर एवं सांस्कृतिक कार्यक्रमका सभापति समाजका अध्यक्ष गुणराज शर्माले पर्वत जिल्लामा परोपकारी कामका लागि आवश्यक पर्ने आर्थिक कोषका लागि आयोजना गरेको कार्यक्रम सफल बनाउन बेल्जियममा बसोबास गर्ने सबै प्रवासी नेपालीहरुको सहयोग रहेकोमा आभार र सम्मान व्यक्त गर्दै धन्यवाद दिए ।
कार्यक्रम समापन गर्दै शर्माले संस्थाले सञ्चालन गर्ने परोपकारी काम र योजनामा भविष्यमा पनि सबैको साथ सहयोग रहने बताए । अन्तर्राष्ट्रिय पर्वत समाजले स्थापना कालदेखी नेपालमा शिक्षा, स्वास्थ्य, सामाजिक सेवा र भौतिक बिकासमा सहयोग गर्नका लागि निम्न तहका नेपालीहरुलाई आर्थिक, भौतिक सहयोग गर्दै आएको छ ।
