काठमाडौं । नेपाली कांग्रेसका नेता डा.शेखर कोइरालाले कांग्रेसको महानगर समितिका सभापतिहरुसँग छलफल गरेका छन्।
आज बिहान काठमाडौँमा भएको छलफलमा कोइरालाले पार्टी नेतृत्व र पदाधिकारीको कार्यशैली हेर्दा तोकिएको समयमा पार्टीको १५ औँ महाधिवेशन हुनेमा शंका व्यक्त गरेका छन्।
उनले तोकिएको समयमा महाधिवेशन नभए पार्टी धरासयी हुने बताए। त्यसको असर आगामी निर्वाचनमा पर्ने भएकाले त्यसप्रति चनाखो हुन उनले पार्टी सभापतिहरुलाई आग्रह गरे।
कोइरालासँगको छलफलमा महानगरका सभापतिहरुले पार्टी मर्यादाक्रम नमिलेको र बिधानले आफूहरुलाई कुनै अधिकार नदिएको गुनासो गरेका छन्।
भेटवार्तामा महानगर सभापतिहरु निलकाजी शाक्य- काठमाडौ, सुवानन्द धाख्वा- ललितपुर, चित्रसेन अधिकारी- भरतपुर, दिपक चापागाईं- विराटनगर र मनिन्द्र नेपाली- वीरगन्ज लगायतको सहभागिता थियो।
