काठमाडौं १३ भदौ । संयुक्त विद्यालय विकास मन्च (यूएसडीएफ) को आयोजनामा माध्यमिक तह र आधारभूत तहबीच छात्रहरुको अन्तर विद्यालय फुटसल प्रतियोगिता–२०८१ सम्पन्न भएको छ । बुधबार आयोजित उक्त फुटसल प्रतियोगिता चाँगुनारायण नगरपालिका–९ ताथलिको सरस्वती शिक्षा सदन स्कुल माध्यमिक र आधारभूत दुवै तहको खेलमा विजेता भएको छ ।
माध्यमिक तहतर्फको फुटसलमा भक्तपुर नगरपालिकाको ग्लीटर फ्युचर स्कुलले द्धितीय स्थान र पारगान एकेडेमीले तृतीय स्थान पाउन सफल भएको थियो। साथै, आधारभूत तहतर्फ भक्तपुर कमलविनायकस्थित पारागन एकेडेमीले द्धितीय स्थान र डेमोस स्कुलले तृतीय स्थान प्राप्त गरेको यूएसडीएफका अध्यक्ष श्रीराम सुवालले जानकारी दिए ।
यूएसडीएफका कोषाध्यक्ष रामप्रसाद खाताखोको संयोजनमा सम्पन्न अन्तर विद्यालय फुटसल प्रतियोगिता–२०८१ मा प्रथम, द्धितीय र तृतीय स्थान प्राप्त गर्न सफल विजेता खेलाडी विद्यार्थीहरुलाई प्रमुख अतिथि नेसनल प्याव्सन भक्तपुरका अध्यक्ष संजय खड्काले शिल्ड प्रदान गरेका थिए ।
यूएसडीएफका सचिव मुकेश योन्जनले यस्ता प्रकारका खेलले विद्यार्थीहरु पढाईको बोझबाट मुक्त भइ अझ अध्ययनमा रुची राख्ने भएकाले विविध खेलका कार्यक्रम आयोजना गरिनुपर्ने बताए ।
