काठमाडौं । धनगढीमा जारी अर्जुन ट्रफी क्रिकेटमा फ्रेन्ड्स क्लब डडेल्धुराले बोस्टर्न झापालाई १४४ रनको लक्ष्य दिएको छ । टस हारेर पहिला ब्याटिङ गरेको डडेल्धुराले खराब मौंसका कारण १५ ओभरमा झारिएको खेलमा निर्धारित ओभरमा ३ विकेट गुमाएर १४३ रन जोड्यो ।
डडेल्धुराका लागि आयुषमान बम र सन्दीप जोराले अर्धशतक प्रहार गरे । ३० बलको सामाना गरेका जोरा ५१ रनमा आउट हुँदा समान ४ छक्का र चौका प्रहार गरे । ओपनर आयुषमान ५७ रनमा नटआउट रहे । उनले ३६ बलमा ७ चौका र एक छक्का प्रहरा गरे । अविजित रहेका किरण ठगुन्नाले १० बलमा २ छक्का र एक चोकोको मद्दतमा २१ रन जोडे । अर्का ओपनर कुशल भुर्तेल २ रनमा आउट भए । बलिङमा झापाका अरुण ऐरीले २ तथा पवन कार्कीले एक विकेट लिए ।
गो ड्रिमर्सको आयोजनामा सुरु भएको प्रतियोगिताको विजेताले नगद १० लाख र उपविजेताले नगद पाँच लाख पाउनेछन् । प्रतियोगिताको सर्वोत्कृष्ट खेलाडीलाई नगद एक लाख प्रदान गरिनेछ । उत्कृष्ट ब्याटर, उत्कृष्ट बलर र उदीयमान खेलाडीले जनही ५०–५० हजार पाउने छन् । प्रत्येक खेलका प्लेयर अफ द म्याचलाई नगद १० हजार प्रदान गरिने आयोजकले जनाएको छ ।
धनगढीमा क्रिकेट खेलको विकासका लागि महत्त्वपूर्ण योगदान गरेका प्रशिक्षक अर्जुन खड्काको स्मृतिमा आयोजना गरिएको प्रतियोगिता माघ २८ गतेसम्म सञ्चालन हुनेछ ।
