असार २३, काठमाण्डौ । नागरिक समाजका अगुवा तथा समाजसेवी डा. सुन्दरमणि दीक्षितले गोविन्द केसीले भनेजस्तो काठमाण्डौमा १० वर्षसम्म मेडिकल कलेज खोल्नु हुँदैन भन्ने कुरा जायज नभएको बताएका छन् ।
काठमाण्डौमा मेडिकल कलेज नहुँदा नेपाली विद्यार्थीहरु विदेशमा गएर लाखौँ खर्च गरेर पढ्नुपर्ने बाध्यता निम्तिने उनको तर्क छ ।
नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै दीक्षितले माथेमा आयोगको प्रतिवेदनमा भएका सबै कुरा व्यवहारिक नभएको जिकिर गरे ।
“माथेमा आयोग भन्यो, ५,६ जना बसे, अनि ल काठमाण्डौमा १० वर्ष मेडिकल कलेज खोल्न नपाउने भन्दिए । यसरी कहाँ हुन्छ ?” दीक्षितले प्रश्न गरे ।
डा. गोविन्द केसी १५ औँ पटकसम्म अनशन बस्दासम्म कुन माग सही र कुन गलत भनेर छुट्टयाउनै कठिन भएको दीक्षितले बताएका छन् ।
केसीले चिकित्सा शिक्षा क्षेत्रको सुधारका लागि सुरुवाती चरणमा राखेका माग र अहिले राखेका मागमा धेरै अन्तर भएको दीक्षितले बताए ।
परिस्थिती र माग फेरिएको अवस्थामा सरकार भने दुई तिहाई बहुमतको भएकाले सही समयमा सही निर्णय गरेर समस्या समाधान गर्ने बेला भएको उनको तर्क छ ।
गोविन्द केसीले भनेको कुरा सारा राष्ट्रले नै मान्नुर्पछ भन्ने कुरा उचित नभएको दीक्षितको भनाई छ । केसीप्रति आक्रोषित देखिएका दीक्षितले भने, “जथाभावी अनशन बस्दै हिँड्ने, उनले चाँही आफ्नो काम गर्नुपर्छ कि पर्दैन ? आफूचाँही जुन बेला पनि सुतेर मात्रै बस्ने ।”
