काठमाडौं, ९ साउन । फिफा उत्कृष्ट वर्ष पुरुष खेलाडीको प्रतिस्पर्धामा ह्यारी केन र मोहम्मद सलाह रहेका छन् । फिफाले मंगलबार सार्वजनिक गरेको १० जना खेलाडीको मनोनयनको सूचीमा इंग्ल्याण्डका कप्तान तथा लिभरपुलका स्टार खेलाडी परेका हुन् ।
त्यस्तै विश्वकप विजेता टोली फ्रान्सका एन्टोइन ग्रिजम्यान, केलियन एमबाप्पे, राफायल भाराने तथा प्रतियोगिताका गोल्डेन बल पाउने क्रोएसियाका लुका मोड्रिच पनि सूचीमा अटाएका छन् ।
साथै चेल्सीका बेल्जियन स्टार इडेन हाजार्ड र म्यानचेस्टर सिटीका प्लेमेकर केभिन डि ब्रुइल सूचीमा अटाउँदा क्रिस्टियानो रोनाल्डो र लियोनल मेस्सी पनि सूचीमा परेका छन् ।
तर पीएसजी स्टार नेइमार भने सूचीमा अटाउन सकेनन् । उनले छोटो समयमै पीएसजीका लागि २८ गोल गरेका थिए । तर २६ वर्षीय नेइमारले ब्राजिललाई विश्वकपको क्वार्टरफाइनल पार गराउन सकेनन् । बेस्ट फिफा मेन्स प्लेयर अवार्ड नयाँ प्रारुपमा सन् २०१६ देखि दिन थालिएको हो । २०१६ र २०१७ मा यो अवार्ड रोनाल्डोले हात पारेका थिए ।
यो अर्वाडका लागि प्रशिक्षक, प्रशंसक तथा सञ्चारकर्मीले भोट गर्नेछन् । उत्कृष्ट वर्ष पुरुष खेलाडीका साथै उत्कृष्ट महिला खेलाडी, उत्कृष्ट पुरुष प्रशिक्षक,उत्कृष्ट महिला प्रशिक्षक, उत्कृष्ट गोलरक्षकका साथै फिफा फ्यान तथा पुस्कास अवार्ड पनि सँगै प्रदान गरिनेछ । तीन जनाको अन्तिम सूची आउँदो सेप्टेम्बरमा सार्वजनिक गरिनेछ ।
ह्यारी केनले सबै प्रतियोगितामा गरेर टोटेनह्यामका लागि गएको सिजनमा ४० गोल गरेका छन् । त्यस्तै विश्वकपको सेमीफाइनलसम्म टिमलाई पुर्याएका केनले सबैभन्दा धेरै गोल गर्दै सुनको जुत्ता पाएका थिए ।
त्यस्तै लिभरपुल स्टार मोहम्मद सलाहले पहिलो सिजनमै लिभरपुलका लागि ४४ गोल गरेका थिए । ग्रिजम्यान र एम्बाप्पेले विश्वकपका साथै घरेलु प्रतियोगितामा उत्कृष्ट प्रदर्शन गरेका थिए । लुका मोड्रिचले क्रोएसियालाई फाइनलसम्म पुर्याउन उत्कृष्ट प्रदर्शन गरे ।
भर्खरै युभेन्टस प्रवेश गरेका रोनाल्डोले रियल मड्रिडका लागि ४४ गोल गरे भने मेस्सीले बार्सिलोनाका लागि ४५ गोल । तर दुवैले विश्वकपमा भने अन्तिम १६ भन्दा अगाडि आफ्नो देशलाई अगाडि लैजान सकेनन् । विश्वकप र घरेलु प्रतियोगितालाई आधार मान्ने हो भने उत्कृष्ट खेलाडीको अवार्डको दौडमा ह्यारी केन अगाडि देखिन्छन् । एजेन्सी
