काठमाडौं, २३ मंसिर । स्पेनिस लिग फुटबलमा बार्सिलोनाले इस्पानियोललाई ४–० ले हराएको छ । गएराति इस्पानियोलको मैदानमा भएको बार्सिलोना डर्बीमा बार्सालाई विजयी गराउन लियोनल मेस्सीले दुई गोल गर्दा ओस्मान डेम्बेले र लुईस सुवारेजले एक–एक गोल थपे ।
जितपछि बार्सिलोनाले स्पेनिस लिगको अंक तालिकामा दोस्रो स्थानको सेभियासँग ३ अंकको अग्रता लिएको छ । बार्साको १५ खेलबाट ३१ अंक छ भने समान खेलबाट सेभियाको २८ अंक छ ।
सेभियाले गएराति भएको खेलमा भ्यालेन्सियासँग १–१ गोलको बराबरी खेलेको छ । यसैगरी एथ्लेटिको मड्रिडले डेपोर्टिभो आलाभेजलाई ३–० ले हराउँदा सेल्टा भिगोले भियारियाललाई ३–२ ले हराएको छ । ला लिगा फुटबलमा आज रियाल मड्रिडले हुएस्कासँग खेल्नेछ ।
एजेन्सीको सहयोगमा
