काठमाडौं, ८ बैशाख । ला लिगा अन्तर्गत शनिबार राति भएको खेलमा बार्सिलोनाले रियल सोसिडाडलाई २–१ ले पराजित गरेको छ। जितसँगै लिगको उपाधि जितका लागि बार्सिलोनाको अवस्था थप मजबुत बनेको छ। उसले दोश्रो स्थानको एथ्लेटिको मड्रिडसँग ९ अंकको अन्तर बनाएको छ।
शनिबार सम्पन्न खेलमा बार्सिलोनाले खेलको ४५औं मिनेटमा अग्रता लिएको थियो। उसका लागि क्लेमेन्ट लेङ्लेटले गोल गरे। पहिलो हाफमा १-० ले पछि परेको सोसिडाडले दोश्रो हाफको ६२ औं मिनेटमा बराबरी गोल फर्कायो। सो बराबरी गोल जुवानमीले गरेका थिए।
तर सो बराबरी दुई मिनेटमै सकियो। लियोनेल मेस्सीको पासमा जोर्डी अल्वाले ६४ औं मिनेटमा बार्सिलोनाका लागि गोल गरे र नतिजा आफ्नो पक्षमा पारे।
ला लिगामा बार्सिलोनाको ३३ खेलबाट ७७ अंक जोडेको छ भने ६८ अंकसहित दोस्रो स्थानको एथ्लेटिको मड्रिड रहेको छ । यस्तै उनीहरू भन्दा एक खेल कम खेलेको रियल मड्रिड ६१ अंकसहित तेश्रो स्थानमा रहेको छ । अब लिग विजेता बन्न बार्सिलोनाले बाँकी ५ खेलमा २ मा जित निकाले पुग्छ।
