मदन भण्डारी स्पोर्टस् एकेडेमी चन्द्रागिरि नगर कमिटीको आयोजनामा दोस्रो संस्करणको चन्द्रागिरि उपमेयर कप विद्यालयस्तरीय खुल्ला छात्रा भलिबल प्रतियोगिता हुने भएको छ ।
यही जेठ ८ देखि ११ गतेसम्म हुने उक्त प्रतियोगितामा विभिन्न १० टोलीको सहभागिता रहने आज यहाँ आयोजित पत्रकार सम्मेलनमा संयोजक कुमार राईले जानकारी दिनुभयो । खेल ‘लिग कम नकआउट’का आधारमा खेलाइने छ । लिग र क्वाटरफाइनलका खेल वेष्ट अफ थ्री का आधारमा खेलाइनेछ । सेमिफाइनल र फाइनल ‘वेष्ट अफ फाइभ’का आधारमा हुने छ ।
नेपाल भलिबल सङ्घको तत्वावधानमा हुने प्रतियोगिता चन्द्रागिरिस्थित न्यू डायमण्ड एकेडेमीको खेल मैदानमा हुनेछ । प्रतियोगिताको विजेताले रु ६० हजार तथा उपविजेताले रु ३० हजार पाउनेछ । त्यस्तै तेस्रो हुने टोलीले रु १५ हजार तथा चौथो हुनेले रु १० हजार प्राप्त गर्नेछन् ।
सर्वोत्कृष्ट खेलाडीले रु एक हजार ५०० र व्यक्तिगत विधातर्फ ९स्पाइकर, ब्लकर, सर्भर, डिफेन्डर, सेटर० ले जनही रु एक हजार पाउनेछन् । रासस
