बाजुरा, १८ पौष । बाजुरामा बिहिबार भएको जीप दुर्घटनामा एकजना महिलाको खप्परको हड्डीमात्र फेला परेको छ । कालापडा भन्ने स्थानमा भएको घटनामा चारजनाको शव भेटिएपनि महिलाको शव नभेटिएको हो ।
खप्परको हड्डी भेटिएपनि महिलालाई मृत घोषित गरिएको छैन । पोस्टमार्टमबाट मात्र त्यसको यकिन हुने बाजुरा प्रहरीले जनाएको छ । तर, खप्परको हड्डीसँगै चुनरी पनि भेटिएको छ । जीप कर्णाली नदिमा खसेको छ । जीप निकाल्न असम्भव जस्तै रहेको प्रहरीले जनाएको छ ।
मृतकमध्ये चार जनाको शव भीर र जीपभित्र च्यापिएको अवस्थामा भेटिएको थियो । भीरमा गुल्टिएको जीपबाट उछिट्टिएर चारजनाको ज्यान जोगिएपनि उनीहरुको अवस्था चिन्ताजनक छ । घाइतेलाई हेलिकोप्टरबाट उपचारका लागि नेपालगञ्ज लगिएको छ ।
नौ जना चढेको जीप आज कोल्टीबाट धुलाचौरतर्फ गइरहँदा जीप कर्णाली नदीमा खसेको थियो । बाजुराबाट स्वामीकात्तिक गाउँपालिका प्रहरी इञ्चार्ज प्रहरी सहायक निरीक्षक पदम सिंह साउदले जानकारी दिए अनुसार चार जनाको घटनास्थलमै मृत्यु भएको थियो । एकजना महिलाको शरीर नभेटिएकाले यकिन भइसकेको छैन ।
यसैगरी, ज्यान गुमाउनेहरुमा हिमाली गाउँपालिका ७ का पवन भण्डारी र जगन्नाथ गाउँपालिका ५ का रमेश शाहीको सनाखत भइसकेको छ ।-File Photo
