काठमाडौं, २४ माघ । काठमाडौं उपत्यका खानेपानी लिमिटेड, एकीकृत स्वतन्त्र कर्मचारी युनियनले आफ्ना अध्यक्ष गोपाल सिंह धामीमाथि गलत आरोप लगाएर पक्राउ तथा धरपकड र घर खानतालसी गरेको भन्दै कडा निन्दा गरेको छ ।
समितिले भनेको छ,‘हाम्रा अध्यक्षमाथि केही समय अगाडिदेखि लगाईएका लाञ्छनामा कुनै सत्यता छैन् । आधिकारिक ट्रेड युनियनको निर्वाचन नजिकिँदै गर्दा अन्य युनियनका साथीहरुले चुनाव हार्ने भयले अत्तालिएर यस्तो प्रपञ्च र षड्यन्त्र रचेका हुन भन्ने हाम्रो समितिको निश्कर्ष छ । उहाँमाथि लगाईएका आरोपहरु सबै निराधार र कपोकल्पित हुन् । हामी डटेर सामना गर्छौं ।’
शुक्रबार समितिले रिपोर्टर्स क्लब नेपालमा पत्रकार सम्मेनलको आयोजना गरेर अध्यक्ष धामीमाथि लगाईएका आरोपलाई चिर्नको लागि सञ्चारकर्मी तथा मानवअधिकारकर्मीहरुसँग सहयोगको अपिल समेत गरेको छ । कार्यक्रममा बौल्दै अध्यक्ष धामीले आफूमाथि लगाईएका झुठा आरोप र निराधार लाञ्छानाले मानसिक रुपमा असर परेको गुनासो पोखे ।
धामीले आफूहरुको कुनैपनि राजनीतिक दलसँग आवद्धता नरहेको स्पष्ट पारे । उनले भने,‘हाम्रो समिति भनेको सबै साथीहरुको पेशागत साझा र स्वतन्त्र युनियन हो । हामी कुनै दलसँग सम्वद्ध नभएकै कारण दुःख दिने काम भयो ।’ आफूहरुले त्यहाँभित्र अनियमितता, अपारदर्शीता, ढिलासुस्तीलगायतका विकृति तथा विसंगतिको विरोध गरेको पनि धामीले सुनाए ।
उनले भने,‘कर्मचारीहरुको हकहितको लागि आवाज उठाउँदा अमुक ट्रेड युनियनले आउने आधिकारिक ट्रेड युनियनको चुनाव आफूले हारिन्छ भनेर यस्तो गलत षड्यन्त्र रचेर दुःख दिने काम गर््यो ।’ उनले आफूलाई दुःख दिनकोलागि अमुक ट्रेड यूनियनले राज्य संयन्त्रसमेतको दुरुपयोग गरेको आरोप लगाए ।
उनले भने,‘विगत केही समय अगाडी देखि म माथि लगाइएका निराधार लाञ्छना त्यसको परिणाम स्वरुप कार्यालय परिसरबाट गरिएको धरपकडका साथै सोधपुछ जसबाट म, मेरो परिवार मैले नेतृत्व गरेको ट्रेड युनियनमा आबद्ध साथीहरु र मेरा अन्य शुभचिन्तक मित्रहरुमा पर्न गएको मानसिक यातना र सिर्जित संत्रासपूर्ण वातावरणको अन्त्य गर्दै स्वतन्त्र रुपमा जिउन पाउने मानवको नैसर्गिक अधिकारको रक्षार्थ आम नागरिक, संचारकर्मी एवं मानव अधिकारकर्मीहरु समक्ष समेत आव्हान गर्ने उद्देश्यले यहाँहरु समक्ष उपस्थित भएको छु ।’
उनले आफू काठमाण्डौ उपत्यका खानेपानी लिमिटेड (केयुकेएल) मा कार्यरत भएको सुनाउँदै के.यु.के.एल, एकिकृत स्वतन्त्र कर्मचारी युनियन नामक ट्रेड युनियन नेपाल सरकार, श्रम कार्यालयमा विधिवत रुपमा दर्ता गरी त्यसको नेतृत्व समेत गरिरहेको सुनाए । उनले भने,‘विगतमा तत्कालिन बिधार्थी संगठनको विभिन्न तहमा क्रियाशिल रहेको र म तत्कालिन नेपाल खानेपानी संस्थानमा सेवा प्रवेश पश्चात् ट्रेड युनियनमा आबद्ध रही क्रियाशिल रहेको व्यहोरा समेत अनुरोध गर्दछु । वि.सं. २०७४ साल पौष महिनादेखि म कुनैपनि राजनैतिक पार्टी तथा राजनैतिक पार्टीका कमिटी वा संघ संगठनमा संगठित र आवद्ध नरही स्वतन्त्रतापूर्वक आफ्नो पेशा अपनाउदै आएको छु ।’
तर, वि.सं. २०७५ आषाढदेखि केयुकेएलमा कार्यरत कर्मचारीहरुको सहमतिमा विशुद्ध पेशागत, राजनैतिक आवद्धताविहिन स्वतन्त्र पेशागत ट्रेड युनियन के.यु.के.एल, एकिकृत स्वतन्त्र कर्मचारी युनियन गठन गरेको उनले सुनाए । धामीले थपे,‘यो विधिवत रुपमा संस्था दर्ता गरी अध्यक्षको हैसियतमा म क्रियाशिल छु, हाम्रो युनियनको राजनैतिक आवद्धता विहिनताको स्थितीको अवाञ्छित फाइदा उठाउदै छिद्रान्वेषी चरित्रका केही व्यक्तिहरुले मैले नेतृत्व गरेको ट्रेड युनियनलाई प्रतिबन्धित नेकपासँग आबद्ध रहेको गलत सूचना सम्प्रेषण गरी राज्यसंयन्त्रलाई समेत दिग्भ्रमित पार्न सफल भएका छन । म माथि पटक–पटक गरिएको धरपकड, मेरो निवासमा खानतलासिबाट मलाई दोषी प्रमाणित गर्न असफल भएको अवस्थामा समेत म, मेरा परिवार र मेरा साथीहरुले बाध्य भएर बाँच्नुपरेको संत्रासपूर्ण अवस्थाको समेत परिकल्पना यहाँहरुबाट नै होस भन्ने विनम्र अनुरोध गर्दछु ।’
सम्पूर्ण नागरिकहरुको जीवन स्वतन्त्रतापूर्वक बाँच्न पाउने अधिकार र उसको सम्पत्तिको रक्षा नै राज्यको प्रमुख कर्तव्य भएको सुनाउँदै उनले मानव भएको नाताले स्वतन्त्रतापूर्वक बाँच्न पाउने नैसर्गिक अधिकार र नेपाल राज्यको नागरिकको हैसियतले आफू, आफ्ना परिवार र साथीहरुको आधारभुत अधिकार नेपालको संविधानले समेत मुखरित गरेको व्यहोरा स्मरण गराउन गराए ।
उनले भने,‘आज म यहाँहरुलाई पुन: म कुनै राजनैतिक पार्टी र त्यसमा आवद्ध संघ/संगठनसँग आवद्ध नरही स्वतन्त्र र विशुद्ध पेशागत ट्रेड युनियनकर्मीको हैसियतले क्रियाशिल रहेको अवगत गराउदै म, मेरा परिवार र मेरो साथीहरुको नैसर्गिक र संवैधानिक अधिकारको रक्षार्थ कपोलकल्पित भ्रामक आरोपलाई चिर्न सहयोगको अपिल समेत गर्दछु । भोलीका दिनमा एक स्वतन्त्र नागरिकले आफ्नो देशमा निर्भिकताका साथ बाँच्न पाउने अवस्थाको सिर्जनाको लागि स्वतन्त्रतापूर्वक छानबिन गरी कारबाहीको लागि समेत अनुरोध गर्दछु ।’
कार्यक्रममा समितिको तर्फबाट महासचिव प्रेमराज त्रिपाठीले विज्ञप्ती वाचन गरेका थिए । अध्यक्ष धामीमाथि झुठो आरोप लगाएर यही माघ १९ गते पक्राउ गरिएपछि समितिका महासचिव त्रिपाठीकै नाममा विज्ञप्ती जारी गरी धरपकड, गिरफ्तारी र खानतलासीजस्ता गतिविधि बन्द गर्न सरकारलाई आग्रह गरेको थियो ।
प्रेस विज्ञप्ती
मिति :– २०७६।१०।२०
आदरणीय कर्मचारी मित्रहरु !
राजनैतिक दलहरुसँग असंलग्न रहि आम कर्मचारीहरुको साझा स्वतन्त्र पेशागत छाता संस्थाको रुपमा के.यू.के.यल एकिकृत स्वतन्त्र कर्मचारी युनियन स्थापित भएको कुरा सर्वविदितै छ ।
कम्पनीको संरचनागत, नीतिगत, व्यवस्थापकीय तथा प्रशासनिक सुधार र कर्मचारीहरुको वृत्ति विकास, सेवा सुरक्षा, स्थायित्व एवं सेवा सुविधाको सुनिश्चितताका निम्ति निरन्तर क्रियाशिल रहेको व्यहोरा यहाँहरुलाई अवगत नै छ ।
प्रिय कर्मचारी साथीहरु ! आम नागरिकको सुरक्षा र मुलुक भित्र अमनचयनको स्थापना नै राज्य स्थापनाको मुल उद्देश्य हो । सामाजिक, सास्कृतिक बहुलताका साथै वैचारिक बहुलता पनि विद्यमान रहनु आधुनिक राज्यको सुन्दर पक्ष हुन तर यि तमाम यथार्थतालाई स्वीकार गर्न नसक्ने संकिर्ण मानसिकताका धनी मुठ्ठीभर व्यक्तिहरु राज्य सत्तालाई समेत दिग्भ्रमित पार्दै आम कर्मचारीहरुमा त्रसित र अस्थिर वातावरण सिर्जना गर्न लागेको तर्फ सवै सजग रहनु अनिवार्य छ ।
कम्पनीमा देखा परेका नीतिगत भ्रष्टाचार, प्रशासनिक ढिलासुस्ती, कर्मचारीहरु प्रति गरिने विभेद, संस्थागत चाकडी, चाप्लुसी, अपारदर्शिता लगायतका विकृती, विसंगती र व्यथितीहरुका विरुद्धमा भण्डाफोर अभियान चलाउदा अत्तालिएका किर्नाहरुले दुषित मनसायबाट यस युनियन र नेतृत्वलाई सिध्याउन अनेक खालका षडयन्त्रहरु विगत समयदेखि नै गर्दै आएका थिए । युनियनको मुख्य नेतृत्वलाई प्रतिबन्धित नेकपासँग जोडेर कहिले प्रहरी प्रशासन मार्फत कपोकल्पित मनगढन्ते झुटा उजुरी हाल्ने र कहिले ट्रेड युनियन कार्यालयबाट फोन गरेर प्रहरी प्रशासन बोलाउन लगाइ आम कर्मचारीहरुको बिचमा भ्रमपूर्ण कुप्रचार गर्दै हिडने गरेको सन्दर्भ घाम जस्तै छर्लङ्ग छ ।
पछिल्लो समय के.यु.के.एल., एकिकृत स्वतन्त्र कर्मचारी युनियनको पहलमा भएका कर्मचारीहरुको वृत्ति विकासको सुनिश्चितता नीतिगत र विधिवत वातावरणको निर्माण लगायत झुट र भ्रमको पर्दाफासबाट अत्तालिएका केही व्यक्तिहरुका सामु श्रम कार्यालय र के.यु.के.एल., व्यवस्थापन समेतको सहमतिमा हुन लागेको आधिकारिक ट्रेड युनियनको निर्वाचनमा के.यु.के.एल., एकिकृत स्वतन्त्र कर्मचारी युनियन तर्फ सकारात्मक बनेको वातावरणबाट आफ्नो अस्तित्वमा नै प्रश्न चिन्ह खडा हुन जाने यथार्थबाट भयभित भई के.यु.के.एल., एकिकृत स्वतन्त्र कर्मचारी युनियनका अध्यक्ष गोपाल सिंह धामीलाई २०७६।१०।१९ गते प्रहरी प्रशासन प्रयोग गरी कार्यरत कार्यालय परिसरबाट नै नियन्त्रणमा लिई बासस्थान खानतलासी अन्य सोधपुछ लयागत मानसिक प्रताडना दिने कार्य प्रति यस युनियन खेद व्यक्त गर्दछ । साथै यस्ता अवाञ्छित गतिविधी माथि नियन्त्रण गर्दै आवश्यक छानबिन गरी दोषी उपर कडा भन्दा कडा कारबाही गर्न सम्बन्धित निकायसँग जोडदार रुपमा माग गर्दछौ ।
तसर्थ, सम्पूर्ण कर्मचारी मित्रहरु ! पार्टी राजनीतिक भन्दा स्वतन्त्र रहेर शुद्ध पेशागत हकहितका खातिर ट्रेड युनियन खोल्न र सो सम्बन्धी गतिविधी गर्न पाइन्छ कि पाइन्न ? पार्टी विशेषको कार्यकर्ताको नाममा समग्र ट्रेड युनियनको धज्जी उडाउदै अनाहकमा दु.ख दिने काम मानवीय होकी अमानविय यस्ता यावत प्रश्नहरुका उत्तर खोज्न तपाई हामी सबै निरनतर रुपमा कर्मशिल बनौ ।
कर्मचारीका मुखुण्डो भित्र मानविय स्वरुपमा आफु भित्र ब्वाँसा प्रवृत्ति समाहित गरेकाहरुलाई नाङ्गेझार बनाउदै हामी कर्मचारी हकहित र स्वच्छ ट्रेडयुनियन गतिविधिमा संलग्न होऔं । सत्य मौन रहेको बखत झुटको थुतुनो खुल्ला हुन थाल्छ । तसर्थ, सम्पूर्ण झुटको पर्दाफास गर्न र वर्तमान अवस्थासम्म कर्मचारीहरु माथि गरिने ज्यादतीहरुको हिसाब किताब आधिकारीक ट्रेड युनियनको निर्वाचन मार्फत गर्न हामी सबै एकजुट होऔं र सतिसाल झै दृढ निश्चयी बनौं ।
प्रेमराज त्रिपाठी
महासचिव
