काठमाडौं, १५ फागुन । सत्तारुढ दल नेपाल कम्युनिष्ट पार्टी (नेकपा) का अध्यक्ष तथा प्रधानमन्त्री केपी शर्मा ओलीले पार्टीभित्र ठूलो भूकम्प गएको स्विकार गरेका छन् । यद्धपी उनले यो भुकम्पले घर नभत्किने दाबी गरे ।
रवीन्द्र अधिकारी स्मृति प्रतिष्ठानले अधिकारी निधनको १ वर्ष पुगेको पुण्य स्मृतिमा बिहिबार पोखरामा गरेको कार्यक्रमलाई काठमाडौंबाट भिडियोमार्फत् सम्बोधन गर्दै उनले यस्तो टिप्पणी गरे ।
उनले पार्टीमा अहिलेको भुकम्पले घर हल्लिएको मात्र बताउँदै यसले घर नै नभत्काउने जिकिर गरे । उनले नेताहरुबीच एकता जरुरी रहेकोमा जोड दिएका छन् । प्रधानमन्त्री ओली तत्कालीन पर्यटनमन्त्री स्व.रवीन्द्र अधिकारीलाई बहुआयामिक व्यक्तित्वको संज्ञा दिए ।
२०७५ फागुन १५ गते तत्कालीन संस्कृति, पर्यटन तथा नागरिक उड्डयनमन्त्री रविन्द्र अधिकारी सवार हेलिकोप्टर ताप्लेजुङको पाथीभरामा दुर्घटना हुंदा उनीसहित ७ जनाको मृत्यु भएको थियो । अधिकारीसँगै चर्चित पर्यटन व्यवसायी आङछिरिङ शेर्पाको पनि निधन भएको थियो । file photo/Mukunda Kalikote-RN
