काठमाडौं, २ वैशाख । देशमा फेरि कोरोना भाइरसका संक्रमित थपिएका छन् । पेप्सीकोला टाउन प्लानिङस्थित सनसिटी अर्पाटमेन्टमा बसोबास गर्नेमध्ये दुईजनामा संक्रमण भेटिएको हो ।
संक्रमित थपिएसँगै नेपालमा कोरोना संक्रमितको संख्या १६ पुगेको छ । संक्रमितहरु लन्डनबाट आई बसोबास गर्ने एकै परिवारका भएको स्वास्थ्य मन्त्रालयले जनाएको छ ।
मन्त्रालयका अनुसार संक्रमित ५८ वर्षीय पुरुष र ८१ वर्षीया महिला छन् । उनीहरुको पीसीआरबाट थप परीक्षण गर्दा पोजेटिभ देखिएको मन्त्रालयले जनाएको छ ।
यसअघि तीन जनामा पोजेटिभ देखिएकोमा पीसीआरबाट थप परीक्षण गर्दा दुई जनामा संक्रमण निश्चित भएको थियो । १ वैशाखमा परीक्षणबाट उनीहरु संक्रमित भएको पुष्टि भएको मन्त्रालयले जानकारी दिएको छ ।
