समाजको नजरमा प्रतिष्ठित शिक्षक, राजनीतिक दलका नेता–कार्यकर्ता तथा व्यवसायीसमेतले १३ वर्षीया बालिकालाई बारम्बार बलात्कार गरी गर्भवतीसमेत बनाएको पोल खुलेपछि जिल्ला प्रहरी कार्यालय धनकुटाले चारमध्ये तीन जनालाई पक्राउ गरेको छ ।
अति गरिब परिवारकी १३ वर्षकी बालिकालाई ललाई फकाई, डर धम्की देखाई बलात्कार गरेको र पाँच महिनाको गर्भ रहेको खुलेपछि आत्माराका नेकपा– ६ नम्बर वडा कमिटी सदस्य तथा व्यापारी गौरी अत्री, धनकुटाको सिरानबजारको नेवारी खाजा पसलका सञ्चालक देवेन्द्र श्रेष्ठ, कचिडेका भक्तबहादुर मगरलाई धनकुटा प्रहरीले पक्राउ गरेको हो । घटनामा संलग्न बालिकालाई पनि पढाउने धनकुटा–६ स्थित माथिल्लो गोकुण्डेश्वर माविका नेपाली शिक्षक, नेकपानिकट शिक्षक संगठनका पूर्वकेन्द्रीय सदस्य तथा पार्टी जिल्ला कमिटीको प्रचार विभाग उपप्रमुख मदन अधिकारी भने फरार छन् ।
छोरीलाई बलात्कार गरी गर्भवतीसमेत बनाएको थाहा पाएपछि बिहीबार बालिकाका बुबाले प्रहरीमा जबर्जस्ती करणीको उजुरी दर्ता गराएका थिए । उजुरी लिएलगत्तै त्यसैदिन प्रहरीले तीन जनालाई पक्राउ गरे पनि शिक्षक नेता भने फरार छन् । बलात्कार गर्ने चारै जना ४०-५० वर्षमाथिका छन् ।
शिक्षक एवं नेता मदन अधिकारीले परीक्षाको फाराम भर्ने बहानामा बाबुको नागरिकता लिएर आउनू भनी उनकै घरमा बोलाएर बलात्कार गरेको बालिकाले बताएकी छन् । त्यस्तै नेकपाका ६ नम्बर वडा कमिटी सदस्य तथा व्यापारी गौरी अत्रीले गोठालो गएका बेला डर धम्की देखाई बलात्कार गरेको बताइएको छ ।
नेवारी खाजा पसलका देवेन्द्र श्रेष्ठले धनकुटा नगरपालिकाको फोहोर व्यवस्थापन केन्द्रको साइडमा गोठालो गएको दाउ छोपेर पटकपटक बलात्कार गरेको बालिकाले बताइन् । त्यसैगरी कचिडेका भक्तबहादुर मगरले पनि गोठालो गएकै बेला धनकुटाको सल्लेरी वन क्षेत्रमा आफूलाई बलात्कार गरेको बालिकाको भनाइ छ ।
चारै जनाले आफूलाई पटकपटक बलात्कार गरेको र कसैलाई भने आफू र बुबालाई मारिदिने धम्की दिँदै आएको पनि बालिकाले बताएकी छन् ।
बालिकाको गत वर्ष मात्रै १२ वर्षको उमेरमा महिनावारी भएको थियो । प्रहरीका अनुसार बालिकाको पेटमा हाल पाँच महिनाको गर्भ छ । बाबुले सौता हालेपछि उनकी आमा अन्यत्र लागिन् । कम बोल्ने, भलाद्मी र लज्जालु स्वभावकी बालिकाले बुबा हजुरबुबाको उमेरका आफ्नै शिक्षक र अन्य तीन जनाबाट पटकपटक बलात्कारमा परे पनि कसैलाई भन्न सकेकी थिइनन् । आमासँग बोलचाल नै नभएको र बाबुसँग डर लागेकाले कसैलाई भन्न नसकेको बालिकाले बताएकी छन् ।
छिमेकीका अनुसार बालिकाका बाबुले सौता ल्याएपछि उनी र उनकी बहिनीलाई सानैमा छाडेर आमा पोइल गइन् । अर्कीसँग पनि बाबुको सम्बन्ध बिग्रेर अलग्गिएपछि ती बालिका र उनकी बहिनी बुबासँग बस्दै आएका छन् । सौतेनी आमा तीन छोरीसहित अलग्गै बस्छिन् ।
बालिकाले घटनामा संलग्न व्यक्तिको नाम सार्वजनिक गरेपछि खासगरी बालिकाकै शिक्षकमार्फत बालिकाका बुबालाई प्रतिव्यक्ति तीन÷तीन लाख रुपैयाँ दिने प्रलोभनसहित दवाव दिएको बताइए पनि बालिकाका बुबाले जबर्जस्ती करणीअन्र्तगत आफूले मुद्दा दर्ता गरिसकेका छन् । गर्भ के गर्ने भन्नेबारे जिल्ला अस्पताल धनकुटाका डाक्टरहरूसँग सल्लाह भइरहेको पारिवारिक स्रोतले जनाएको छ ।-जनआस्थाबाट
