काठमाडौं, जेठ १३ । निजी डेरी र सरकारी स्वामित्वको नेपाल दुग्ध विकास संस्थान (डीडीसी) को गरी ६ अर्ब रुपैयाँभन्दा बढी मूल्यको धूलो दूध र बटर डम्प भएको छ । बढी खपत हुने होटल तथा रेस्टरेन्ट, पार्टी प्यालेस, स्कुल, क्याफेलगायत क्षेत्र बन्द भएपछि यस्तो अवस्था आएको हो ।
धूलो दूध ८ सय ५० टन र बटर ६ सय २५ टन मौज्दात रहेको डीडीसीका योजना तथा बजार व्यवस्था विभाग प्रमुख सञ्जीव झाले जानकारी दिए । ‘बटर र दूध गरी १ अर्ब रुपैयाँभन्दा बढीको डम्प भयो,’ झाले भने, ‘पुँजी बल्क हुँदा किसानलाई चैत १५ यताको भुक्तानी गरेका छैनौं ।’ डेरी उद्योगीसँग करिब ५ अर्ब रुपैयाँको धूलो दूध र बटर रहेको नेपाल डेरी एसोसिएसनका महासचिव प्रह्लाद दाहालले जनाएको आजको कान्तिपुर दैनिकमा खवर छ ।
