ललितपुर, १४ जेठ । नेपालमा कोरोना भाइरसको संक्रमणबाट पाचौं व्यक्तिको मृत्यु भएको छ । कलेजोको संक्रमणबाट किष्ट अस्पताल भर्ना भएका व्यक्तिको मृत्यु भई स्वाब संकलन गरी नमुना परीक्षण गर्दा कोरोना पुष्टि भएको हो ।
५६ वर्षीय पुरुषको बुधबार निधन भएको र कोरोना भाइरसको संक्रमण मृत्युपछि मात्र पुष्टि भएको विश्वस्त स्रोतले जानकारी दिएको छ । स्रोतले भन्यो, ‘कोरोना संक्रमण पुष्टि भएको छ र यसबारे आधिकारिक जानकारी छिट्टै आउनेछ ।’
१२ जेठमा किष्ट अस्पतालमा ललितपुर बुङ्मती घर भएका ती पुरुष भर्ना भएका थिए । उनको निधन भएपछि किष्ट अस्पताल क्षेत्रमा सुरक्षा कडा पारिएको छ ।
यसअघि नेपालमा चार व्यक्तिको कोरोना भाइरसको संक्रमणबाट मृत्यु भएको पुष्टि भइसकेको छ । आज समेत मृत्यु हुनेमा ४ पुरुष र १ महिला छन् ।
