काठमाडौं, मंसिर १९ । नेपाल र भारतबीचको विद्युत् व्यापार सम्झौता (पीटीए) कार्यान्वयनका लागि आठौं सचिवस्तरीय बैठक आगामी साता हुने भएको छ । आगामी साताको बिहीवार र शुक्रवार भर्चुअल माध्यमबाट उक्त बैठक गर्न लागिएको हो ।
नेपाल–भारतबीच २०७१ कात्तिक ४ गते विद्युत् व्यापार सम्झौता भएको थियो । पीटीए कार्यान्वयनका लागि नेपाल–भारतको सचिवस्तरीय बैठक हरेक वर्ष हुँदै आएको छ । पीटीएपश्चात् दुवै देशले आलोपालो बैठक राख्दै आएका छन् ।
यसअघि २०१९ अक्टोबर ९२ (७६ असोज २६ र २७ गते) मा भारतको बैङ्लोरमा यस्तो बैठक सम्पन्न भएको थियो । यसपटक बैठक आयोजना गर्ने पालो नेपालको हो । कोरोना भाइरसको जोखिमका कारण भर्चुअल रूपमा उक्त बैठक गर्न लागिएको ऊर्जा, जलस्रोत तथा सिँचाइ मन्त्रालयले बताएको छ ।
गतवर्षको बैठकले न्यू बुटवल–न्यू गोरखपुर दोस्रो अन्तरदेशीय प्रसारण लाइन (४०० केभी) को निर्माण दुवै देशले बराबर लगानी गरेर बनाउने निर्णय भएको थियो ।
बैङ्लोर बैठकले दुई देशबीच थप दुई अन्तरदेशीय प्रसारण लाइन इनरुवा–पूर्णिया र लम्की–बरेलीको विस्तृत परियोजना प्रतिवेदन पनि स्वीकृत गरेको थियो । यी दुई प्रसारण लाइनको लगानी ढाँचा यो बैठकमा तय गर्ने योजना छ ।
यो बैठकमा अन्तरदेशीय प्रसारण लाइनले नै प्राथमिकता पाउने बताइएको छ । यस्तै, इनर्जी बैंकिङ, प्रचलित प्रसारण लाइनको स्तरोन्नति र सुनौली–गोरखपुर दोस्रो अन्तरदेशीय प्रसारणको प्रस्ताव पनि बैठकमा पेश गर्ने मन्त्रालयको तयारी रहेको आजको आर्थिक अभियान दैनिकमा खवर छ ।
