काठमाडौं, ६ असार । नेपाली काँग्रेसका उपसभापति विमलेन्द्र निधिले सभापतिको उम्मेदवारी दिने बताएका छन् । उनले सभापति शेरबहादुर देउवासँग पनि साथको आग्रह गरेका छन् ।
शनिबार देउवाले आफ्नो खेमाका नेताहरुलाई बोलाएर पार्टीको १४ औं महाधिवेशनको तयारीबारे परामर्श गरेका थिए । उनले सभापतिमा पुनः आफू नै अगाडि बढ्ने आशयको प्रस्तुती गरेका थिए । तर, निधिले आफूले पूर्वतयारी गरिसकेको बताए ।
विश्वस्त स्रोतका अनुसार निधिले देउवालाई पार्टीको सम्मानित नेता बन्न र सरकारको नेतृत्वमा रहन सुझाव दिएका थिए । उनले आफू पार्टीको भावी नेतृत्वका लागि बढ्ने स्पष्ट पारेका थिए ।
पछिल्लो समय निधिले देउवालाई पुनः सभापतिको लागि साथ नदिने संकेतहरु गर्दै आएका छन् । उनी आफै सभापतिको दाबेदार बनेका छन् ।
निधि देउवा खेमाबाट उपसभापति मनोनित भएका थिए । उनले विगत देखि नै देउवालाई साथ दिदै आएका छन् ।
