काठमाडौं, २५ साउन । नेपाली काँग्रेसको भदौमा तोकिएको महाधिवेशन सर्ने निश्चित भएपछि वरिष्ठ नेता रामचन्द्र पौडेल सभापति शेरबहादुर देउवाविरुद्ध आक्रामक बन्दै गएका छन् । उनले विहानै फेसबुकमा देउवामाथि पार्टीलाई भीख माग्ने अवस्थामा पुर्याएको आरोप लगाए ।
यसअघि २३ भदौपछि देउवा काँग्रेस सभापति नरहने टिप्पणी गर्दै आफूले पनि सभापति नमान्ने चेतावनी दिएका थिए । एकपछि अर्को आक्रामक अभिव्यक्ति दिएका पौडेलले आज जिल्ला सभापतिहरुको भेला डाकेका छन् । भेलामा ३५ जिल्ला सभापति प्रत्यक्ष र १२ जना भर्चुअल माध्यमबाट सहभागी छन् ।
जिल्ला सभापतिसँग परामर्श गरेपछि पौडेलले साँझ केन्द्रीय सदस्यहरुको भेला बोलाएका छन् । आफू पक्षीय जिल्ला सभापति र केन्द्रीय सदस्यहरुको भेला डाकेर पौडेलले शक्ति प्रदर्शन गरेका छन् । उनले भदौ २३ पछि कडा कदम चाल्नेबारे पनि छलफल गरेका छन् ।
बैठकमा पौडेलले २३ भदौ पछि संविधान अनुसार पनि पार्टीको कार्यकारिणीलगायत १३औं महाधिवेशनबाट निर्वाचित कमिटी स्वतः नरहनेबारे सुनाएका थिए । त्यसपछि कसरी अगाडि बढ्नेबारे उनले परामर्श गरेका थिए । देउवालाई २३ भदौपछि सभापति मान्न नसकिने समेत स्पष्ट पार्दै पौडेलले गम्भीर अवस्था आउनसक्ने औल्याएका छन् ।
पार्टी नै खारेजीको अवस्थामा पुगेकाले देउवा निर्वाचन आयोगमा पुगेको विषय पनि पौडेलले बताएका छन् । उनले देउवामाथि पार्टीलाई निकै कमजोर अवस्थामा पुर्याएको आरोप लगाए ।
