काठमाडौं, ११ पुस । सहिद स्मारक ‘ए’ डिभिजन लिग फुटबलमा आज भएको पहिलो खेलमा संकटा यूथ क्लबले सहज जित निकालेको छ ।
त्रिपुरेश्वर स्थित दशरथ रंगशालामा भएको खेलमा संकटाले ब्रिगेड ब्याइजमाथी ३–० को सहज जित निकालेको हो ।
खेलको १२औं मिनेटमा उत्तम राईले गोल गर्दै संकटालाई सुरुवाति अग्रता दिलाएका थिए ।
२७औं मिनेटमा व्यक्तिगत दोस्रो गोल गर्दै उत्तमले टोलीको अग्रता दोब्बर बनाए ।
साथै, खेलको ३८औं मिनेटमा लक्ष्मण रुचालले गोल गर्दै टोलीलाई जित दिलाए ।
यस जितसँगै संकटा आफ्नो अपराजित यात्रा कायम राख्दै १२ अंकका साथ तेस्रो स्थानमा उक्लिएको छ ।
ब्रिगेड ब्याइज ५ अंकका साथ ११औं स्थानमा घटेको छ । तस्विरः एन्फा
