एजेन्सी । अष्ट्रियाले युईएफए नेसन्स लिगमा उत्कृष्ट शुरुवात गरेको छ । गएराति भएको खेलमा घरेलु टोली क्रोएसियालाई ३-० गोलले पराजित गर्दै अष्ट्रियाले लिगमा उत्कृष्ट शुरुवात गरेको हो ।
स्टाडोन ग्राड्स्कीमा भएको खेलमा अष्ट्रियाको जीतमा मार्को अर्नाउटोभिक, माइकल ग्रेगोरिट्स्च र मार्सल साबिट्जेरले एक/एक गोल गरे । खेलको ४१ औं मिनेटमा ओनिसिओको पासमा अर्नाउटोभिकले गोल गर्दै अष्ट्रियालाई शुरुवाती अग्रता दिलाएका थिए । ५४ औं मिनेटमा वोबेरको पासमा माइकलले गोल गर्दै अष्ट्रियाको अग्रता दोब्बर बनाए ।
यस्तै ५७ औं मिनेटमा बोबेरको पासमा साबिट्जेरले गोल गर्दै अष्ट्रियालाई ३-० गोलको शानदार जीत दिलाएका हुन् । जीतसँगै अष्ट्रिया ३ अङ्क जोड्दै समूह १ को शिर्ष स्थानमा रहेको छ भने पराजित क्रोएसिया अङ्कविहिन रहँदै पुछारमा छ ।
