काठमाडौं, १ असार । नेकपा (एमाले) की सचिव तथा पूर्वमन्त्री पद्यमा अर्यालले वर्तमान सरकारले परराष्ट्र नीतिलाई खिल्ली उडाउँदै एक पक्षतिर ढल्किएको आरोप लगाएकी छिन् । उनले भनिन्–‘यो सरकारको व्यवहार हेर्दै जानुहोस न, हाम्रो परराष्ट्र नीति सन्तुलित हो, असंलग्न हो, तर आज त्योमाथि खलल पार्ने काम भएको छ । आज हेर्नुहोस त, सरकारले एमसीसीबारे अघिल्लो दिनमा के भन्यो, अनि भोलिपल्ट के गर्यो ? आज एमसीसीबारे जनताले उठाएका मुद्दा पुष्टि हुँदैछन्, जनताले भनेका थिए, हामीले ठोकेर भन्छौं कि वातावरण बनाउने काम गरेको छ, एमसीसीमार्फत यो मुलुकमा अमेरिकी सेना आउँदैछ ।’
उनले आजको दिनमा एमाले र माधव नेपाल नेतृत्वको नेकपा (एकीकृत समाजवादी) बीच एकताको सम्भावना नरहेको स्पष्ट पारेकी छिन् । हिजो राति प्राइम टिभीबाट प्रसारण भएको ‘जनता जान्न चाहन्छन्’ कार्यक्रममा पत्रकार ऋषि धमलासँग कुरा गर्दै उनले यस्तो बताएकी हुन् । त्यस्तै, माओवादी केन्द्रसँग पनि आफ्नो पार्टीको एकताको सम्भावना नरहेको उनको दाबी छ । तर, सहकार्य र समन्वयको सम्भावना भने कायमै रहेको उनले स्पष्ट पारिन् । अर्यालले मुलुकलाई नोक्शानी हुने कुरा आफूहरु रहुञ्जेलसम्म कसैले नसोचे हुने चेतावनी पनि दिईन् ।
उनले आफूहरु सरकारको नेतृत्वमा हुँदा सन्तुलित विदेशी नीति र व्यवहार अपनाएको दाबी गरिन् । उनले आगामी संघीय संसद्को निर्वाचनमा वाम गठबन्धन हुने वा नहुने भन्ने कुरा अहिले यकिनका साथ भन्न नसकिने जिकिर गरिन् । उनले आफ्नो पार्टी अस्थिरताको पक्षमा नरहेको र अनुचित ढंगले सरकार परिवर्तन गर्ने पक्षमा पनि नरहेको स्पष्ट पारिन् । उनले वर्तमान सरकारले एकपछि अर्को गरेर गलत काम गरिरहेकोले अब विकल्प खोज्ने बेला पनि आएको बताईन् । उनले सरकार ढाल्ने र नयाँ सरकार बनाउनेगरि आफूहरुले कुनै तयारी नगरेको जिकिर गरिन् ।
