काठमाडौं, मंसिर २७ । राजधानीको तारकेश्वर नगरपालिकाका–३ स्थित चिसापानी सडकखण्डमा मोटरसाइकल दुर्घटना हुँदा एक जनाको मृत्यु भएको छ। मृत्यु हुनेमा बाग्मती प्रदेश ०२–०२५ प ६१८९ नम्बरको मोटरसाइकलमा सवार २३ वर्षीय सविन फुँयाल रहेका छन्।
फुँयाल आईतबार राती साढे ८ बजे गम्भीर घाईते अवस्थामा सडकको छेउमा फेला परेका थिए। बालाजु प्रहरीका अनुसार उनको उपचारको क्रममा राती ११ बजे ग्रिनसिटी अस्पतालमा मृत्यु भएको हो।
स्थानीयले भने घाईते फुँयाललाई टिप्पर चालकले गाडीमा रहेको फलामे रड (सब्बल) प्रहार गरी हत्या गरेको दाबी गरेका छन् । मोटरसाइकललाई ठक्कर दिने टिप्परको नम्बरसमेत खुल्न सकेको छैन् ।
आरोपित टिप्पर चालकलाई प्रहरीले सोमबार बेलुकासम्म नियन्त्रणमा लिन नसकेपछि स्थानीयले सोमबार बेलुका तिनचिप्ले प्रहरी बिटमा तोडफोड गरेका छन् । तोडफोडका क्रममा आक्रोसित स्थानियले प्रहरीको मोटरसाईकलसमेत जनाइदिएका छन् । घटनाबारे थप अनुसन्धान भइरहेको प्रहरीले जनाएको छ।
