काठमाडौं, २० असार । प्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहालले एमालेको अहिलेको बेलुन पनि छिट्टै फुट्ने टिप्पणी गरेका छन् । आफ्नो एक अभिव्यक्तिलाई लिएर एमालेले आक्रामक नीति लिएपछि प्रधानमन्त्री दाहालले एमालेको उक्त बेलुन पनि छिट्टै फुट्नेवाला रहेको बताए ।
सरदार प्रीतम सिंहको बारेमा दिएको अभिव्यक्तिलाई लिएर एमालेले बबन्डर मच्चाउन खोजेको प्रधानमन्त्री दाहालको टिप्पणी छ । आज (बुधवार) पार्टीनिकट अनेरास्ववियु क्रान्तिकारीको स्ववियु काउसिन्लको राष्ट्रिय भेलालाई सम्बोधन गर्ने क्रममा दाहालले यस्तो बताएका हुन् ।
सो क्रममा प्रधानमन्त्री दाहालले प्रितम सिंहबारे दिएको अभिव्यक्तिको बचाउ पनि गरेका थिए । उनले पुस्तक विमोचन कार्यक्रममा सामाजिक सेवा र यातायातको क्षेत्रमा मात्रै नभई राजनीतिमा पनि सिंह चासो राख्ने व्यक्ति भएको र आफूलाई प्रधानमन्त्री बनाउनका लागि कहिले दिल्ली, कहिले नेपालका पार्टीहरूसँग लाग्नुहुन्थ्यो भन्ने अभिव्यक्ति दिएको स्पष्ट पारे ।
दाहालले थपे,‘अब आज म सुन्दैछु, एउटा किताब विमोचन गर्दै गर्दा मैले बोलेको, उसले बोलेको कुरा मैले बोलेको, मेरो कुरा होइन । उसले बोलेको । मैले भने उहाँ सामाजिक सेवा र यातायातको क्षेत्रमा मात्रै होइन, राजनीतिमा पनि उहाँले चासो राख्नुहुन्छ । उहाँले मलाई प्रधानमन्त्री बनाउन कहिले कहाँ पुग्नुहुन्छ, कहिले कहाँ पुग्नुहुन्छ, कहिले दिल्ली, कहिले नेपालका पार्टीहरूसँग लाग्नुहुन्थ्यो उहाँ भन्ने उहाँको बारेमा भनेको कुरालाई अब त्यसलाई उचालेर फेरि एकपटक बबन्डर गर्न खोजिएको छ, त्यो बेलुन पनि छिटै फुट्नेवाला नै छ । त्यसले केही दिनेवाला छैन । हाम्रा विपक्षीमा कति धेरै विक्षिप्तता छ, कति धेरै पूर्वाग्रह छ भन्ने कुरा देखिन्छ ।’
यता, एमालेले भने प्रधानमन्त्री दाहालको त्यही अभिव्यक्तिलाई लिएर सदन अवरुद्ध गर्ने निर्णय गरेको छ । साथै, प्रधानमन्त्री दाहालले राष्ट्रियताविरुद्ध अभिव्यक्ति दिएको भन्दै राजीनामा माग्ने पनि एमाले संसदीय दलको निर्णय छ । एमालेले राष्ट्रियसभाको बैठक भने अवरुद्ध गरिसकेको छ । तस्विर : प्रदीपराज वन्त/प्रमको सचिवालय
