काठमाडौं, साउन ३० । आध्यात्मिक गुरु स्वामी चन्द्रेश महाराजको निधन भएको छ। उनको ८० वर्षको उमेरमा सोमबार राति निधन भएको हो।
लामो समयदेखि मृगौलासम्बन्धी रोगबाट पीडित स्वामी चन्द्रेश नियमित डायलासिस गराउँदै आएका थिए। हिजो राति बुढानीलकण्ठस्थित आश्रमबाट ह्याम्स अस्पतालमा डायलासिसका लागि गएका उनको अस्पतालमा उपचारका क्रममा मृत्यु भएको हो।
भारतको पश्चिम बंगालबाट लामो समयअगाडि नेपाल आएका स्वामी चन्द्रेशले बुढानीलकण्ठमा स्कुल सञ्चालन गर्नुका साथै विभिन्न आध्यात्मिक गतिविधिमा सामेल हुँदै आएका थिए। उनको पार्थिव शरीरलाई आज दिउँसो बुढानीलकण्ठस्थित आश्रममै समाधिस्थ गरिने छ ।
भारतको इस्ट बंगालमा जन्मेका स्वामी चन्द्रेशले कर्मथलो भने नेपालमा बनाएका थिए । नेपालको प्राकृतिक वैभवतामा लठ्ठिएका स्वामी चन्द्रेश नेपालमा विश्वलाई ज्ञान दिने शक्ति रहेको बताउथे । उनले प्राचीन र वैदिक भूमि नेपालले आफ्नो पहिचान गुम्न नदिन मुलुकलाई हिन्दू राष्ट्र बनाउनुपर्ने तर्क गर्थे ।
