काठमाडौं, ३२ साउन । राष्ट्रिय प्रजातन्त्र पार्टीका महामन्त्री एवं सांसद धवलशमशेर राणाले उच्चस्तरीय न्यायिक छानबिन समिति बनाएर संसद् खोल्नुपर्ने औंल्याएका छन् ।
‘उच्चस्तरीय संलग्नताबिना यति ठूलो सुन तस्करी काण्ड हुन सक्दैन । एमाले वा राष्ट्रिय स्वतन्त्र पार्टीले के भन्छन्, हामीले त्यही भन्नुपर्छ भन्ने छैन । सही कुरालाई साथ दिनु भन्नु आर्टनर पार्टनरको कुरा पनि होइन । हामी हरेक इस्युमा समयको माग अनुसार अघि बढ्नुपर्छ । यसमा बदमासी गरिएको छ, कारबाही हुनुपर्छ,’ नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग उनले भने ।
महामन्त्री राणाले उच्चस्तरीय न्यायिक छानबिन समिति बनाउन तयार नहुनु नै गडबडीको संकेत भएको बताए । उनले भने, ‘यतिका दिनसम्म न्यायिक समिति नबनाउनु आफ्नै मान्छे जेल जाला, आफैं फसिएला भनेर हो कि ? नत्र उच्चस्तरीय न्यायिक समिति बनाउन के आपत्ति ? त्यो के ठूलो कुरा हो र ?’
सांसद राणाले सीआईबी सरकार अन्तर्गतको निकाय भएकाले उसले स्वतन्त्र छानबिन गर्न नसक्ने तर्क गरे । उनले भने, ‘सुन काण्डको सीआईबीले पनि छानबिन गरोस् । तर त्यसलाई चलाउने त सरकारले नै हो नि । सुनकाण्डमा सरकारका मान्छे नै संलग्न भएपछि त्यसले कसरी काम गर्छ ? संसद् चल्नुपर्छ तर यति ठूलो सुन तस्करी हुँदा पनि विपक्षको कुरा सुन्न सरकार तयार हुनुपर्छ ।’
कोसी प्रदेशमा राप्रपाले सभामुख पद नलिने पनि राणाले बताए । उनले भने, ‘हामी अहिले कुनै पनि पद लिने पक्षमा छैनौं । हामी अहिले सरकार बाहिरै बस्ने योजनामा छौं । कुनै पनि फोहोरी खेलमा संलग्न हुँदैनौं ।’
राप्रपा अध्यक्ष राजेन्द्र लिङ्देनविरुद्ध गुट खडा नभएको पनि उनको दाबी छ । राणाले भने, ‘यो मिडियाले बंग्याएको कुरा मात्र हो । लोकेन्द्रबहादुर चन्द हाम्रो संस्थापक अध्यक्ष हो । उहाँले बोलाएको बैठकमा हामी गएका हौं । चन्दले अध्यक्षसँग पनि कुरा गर्नुहुन्छ । पार्टीभित्र त्यस्तो कुनै समस्या छैन ।’
