काठमाडौं,२ माघ । प्राइम टाइम्स टेलिभिजन एचडीको प्रमुख कार्यकारी अधिकृत (सीईओ) मा विकास लामिछाने नियुक्त भएका छन् ।
झण्डै २ दशकदेखि टेलिभिजन क्षेत्रमा सक्रिय लामिछानेलाई टाइम्स ब्रोडकास्टिङ प्रालिको बोर्ड बैठकले माघ १ गतेदेखि लागू हुनेगरी प्रमुख कार्यकारी अधिकृतमा नियुक्त गरेको हो ।
टेलिभिजनलाई थप उचाइमा पुर्याउन लामिछानेको भूमिका महत्वपूर्ण रहने टेलिभिजनका अध्यक्ष ऋषि धमलाले विश्वास व्यक्त गरेका छन् । मुलुकको अर्थतन्त्र संकटग्रस्त रहेका बेला टेलिभिजनलाई उचाइ दिनु आफ्नो प्रमुख लक्ष्य भएको नवनियुक्त सीईओ लामिछानेले बताए । उनले टेलिभिजनलाई साझा सहकार्यबाट थप उचाइ दिने र आफू त्यसका लागि लागिपर्ने बताएका छन् ।
सिंगो देश र सञ्चार जगत अप्ठ्यारोमा रहेको अवस्थामा प्राइम टेलिभिजनले देश र समाजलाई दिएको योगदान प्रशंसायोग्य रहेको भन्दै लामिछानेले टेलिभिजनको यो गरिमा सामूहीक प्रयत्नबाट थप माथि पुर्याउनुपर्नेमा जोड दिए ।
