काठमाडौं, फागुन २३ । नेपाली कांग्रेसका सभापति तथा पूर्व प्रधानमन्त्री शेरबहादुर देउवाले नेकपा (एकीकृत समाजवादी) का अध्यक्ष माधवकुमार नेपाललाई भेट्न कोटेश्वर पुगेका छन् । नेता नेपालको निजी सचिवालयका अनुसार आज जन्मदिन परेका नेपाललाई भेट्न सभापति देउवा कोटेश्वर पुगेका हुन् ।
सोमबार बेलुका प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीले अध्यक्ष नेपालको निवासमै पुगेर उनलाई पुगेर भेटेका थिए । ओली र प्रचण्ड नेपालको निवासबाट बाहिरिए लगत्तै राप्रपाका अध्यक्ष राजेन्द्र लिङ्देन त्यहाँ पुगेका थिए । दाहाल र ओलीसँगको दुई घण्टा लामो छलफलमा नेपाललाई सत्ता सहकार्यको लागि प्रस्ताव गरेका थिए ।
नयाँ गठबन्धनको सरकारमा सहभागिता हुने वा नहुने विषयलाई टुङ्गो लगाउन अहिले ११ बजे समाजवादीको केन्द्रीय सचिवालय बैठक बस्दैछ । राजनीतिक समीकरण बदलिएका बेला सभापति देउवा र नेता नेपालको भेटवार्तालाई अर्थपूर्ण रूपमा हेरिएको छ ।
