काठमाडौं, ४ चैत । नेकपा (एमाले) इलाम जिल्ला कमिटीले आसन्न उपनिर्वाचनको उम्मेदवार चयन गर्न छ जनाको नाम सिफारिस गरेको छ । इलाम–२ मा आगामी वैशाख १५ गते उपनिर्वाचन हुँदैछ । इलाम–२ मा हुने उपनिर्वाचनमा उम्मेदवार बन्न एमालेबाट ६ जना आकांक्षी देखिएका छन् । आकांक्षीहरु सुहाङ नेम्वाङ, रविन्द्र सुवेदी, बुद्धि खनाल, नरेन्द्र भट्टराई, देवी क्षेत्री दुलाल र रिप्पल राई रहेका छन् ।
उनीहरु छ जनाकै नाम केन्द्रमा सिफारिस गरेर पठाएको एमाले इलामले जनाएको छ । आवश्यक निर्णय लिने अधिकार केन्द्रलाई रहेको र केन्द्रको निर्णय स्वीकार गरेर उपनिर्वाचनको तयारीमा होमिने पनि एमाले इलाम कमिटीले जनाएको छ ।
गत २०७९ मंसिर ४ मा सम्पन्न प्रतिनिधि सभा सदस्य निर्वाचनमा उक्त क्षेत्रबाट एमालेका उपाध्यक्षसमेत रहेका सुवास नेम्वाङ विजयी भएका थिए । उनको निधन भएसँगै उक्त क्षेत्र जनप्रतिनिधिविहीन बनेको थियो । उम्मेदवारका आकांक्षी सुहाङ सुवास नेम्वाङकै कान्छा छोरासमेत हुन् । यस पटकको उपनिर्वाचनमा उनलाई एमालेले उम्मेदवार बनाउने सम्भावना प्रवल रहेकोसमेत बताइएको छ ।
