काठमाडौं, २० जेठ । नेपाली कांग्रेसका महामन्त्री गगन थापाले अब गृहमन्त्री रवि लामिछानेले संसद्मा बोलेको विषयमा उनीसँग नभएर प्रधानमन्त्री पुष्पकमल दाहालसँग हिसाबकिताब लिने उद्घोष गरेका छन् । प्रतिनिधिसभाको आज (आइतबार) बसेको बैठकको बोल्दै सांसद थापाले भने–‘गृहमन्त्रीले यो सदनमा बोल्दै गर्दा संसद्मा सूचना बेच्ने मान्छे छ, एसेट छ । त्यो भाषण तयार गर्ने बेलामा सुन्ने साथीहरुले माननीयज्यू, तपाईं टेलिभिजनको प्रस्तोता होईन, त्यहाँ गएर बोलेपछि जिम्मा लिनुपर्छ । अब त जवाफ दिनुपर्छ । र, गृहमन्त्रीको जसले जिम्मा पाएको छ, उसले त सदनमा सूचना बेच्ने मान्छे छ भने त्यो त देशद्रोही हो । त्यसलाई त सदनबाट निकाल्नेमात्रै होईन, त्यसलाई त गिरफ्तार गर्नुपर्छ । देशद्रोहको मुद्दा लगाउनुपर्छ । थुन्नुपर्छ । त्यो सिकाउने मान्छे पनि भएनछ । अब गृहमन्त्री बरालिनुभयो भने हामी बरालिनुहुँदैन् । हिसाबकिताब त हामीले लिनुपर्छ । त्यो हिसाबकिताब अब गृहमन्त्रीसँग लिएर पनि काम छैन् । हिसाबकिताब त अब प्रधानमन्त्रीसँग लिने हो ।’
थापाले सहकारी ठगी प्रकरणमा संसदीय छानबिन समिति बनेपछि आफूहरुको माग जायज रहेको कुरा पुष्टि भएको बताएका छन् । थापाले भने–‘सहकारी ठगी प्रकरणबारे हामीले प्रधानमन्त्रीको जवाफ मागेका थियौं । उहाँको जवाफ चित्तबुझ्दो थिएन । हामीले संसदीय छानबिन समिति नै माग्यौं । जेठ १५ गते संसदीय समिति बनेको छ । हाम्रो जायज माग सम्बोधन भएको भए संसद् अवरुद्ध पनि हुनेथिएन । अहिले समिति बनेको छ ।’
कतिपय सहकारीले राम्रो काम गरेको पनि उनले दृष्टान्त सुनाए । अहिले बनेको संसदीय समितिले राम्रो काम गर्दागर्दैपनि किन सहकारी संकटमा परे ? भन्ने विषयमा पनि अध्ययन गर्ने उनको भनाई छ । उनले संसदीय छानबिन समितिले दोषी कसैलाई पनि उन्मुक्ति नदिने स्पष्ट पारेका छन् ।
उनले भने,‘सूर्यदर्शनलगायत सहकारीबाट गोरखा मिडियामा गएको पैसा । गोरखा मिडियाका जिबी, छवि होस कि रवि, दोषी देखिए कानूनबमोजिम कारबाही गर्न सिफारिश गर्छ । नखाएको हो भने विष लाग्नुहुँदैन् । सहकारीको अरबौं रकम ठग्ने १६÷१७ वटा ग्यांग र गिरोह छ । सहकारी ठगहरुको सन्दर्भमा जति शक्तिशाली भएपनि अब कारबाही हुन्छ । सदनलाई ढाँट्ने प्रहरी महानिरीक्षक होस वा महान्यायाधिवक्ता होस, यो समितिले कारबाही गर्छ ।’
Photo By: Mukunda Kalikote/ReportersNepal