काठमाडौं, १९ साउन । राष्ट्रिय परीक्षा बोर्डले २०८० सालमा सञ्चालित कक्षा १२ को परीक्षाको नतीजा सार्वजनिक गरिसकेको छ । परीक्षामा सहभागी नियमिततर्फका कूल ३ लाख ९० हजार ८ सय ६८ विद्यार्थीमा २ लाख ३ हजार ८ सय ४७ विद्यार्थी पास भएका छन् । यसपटकको कक्षा १२ को परीक्षामा कूल १ लाख ८७ हजार विद्यार्थी असफल भएका छन् । कक्षा १२ को रिजल्टमा यस वर्षपनि खास्सै सुधार भएको देखिँदैन । यसै विषयमा रिपोर्टर्स क्लब नेपालले सरोकारवाला निकायहरुसँग आज (शनिबार) साक्षत्कार कार्यक्रम गरेको छ ।
राष्ट्रिय परीक्षा बोर्डका अध्यक्ष महाश्रम शर्माले जिम्मेवार निकायहरुले आ–आफ्नो ठाउँमा सही जिम्मेवारी निर्वाह नगर्दा देशको शैक्षिक उपलब्धी खस्कँदो अवस्थामा पुगेको बताए । उनले अब एकले अर्कोलाई दोष दिनेभन्दा पनि बिग्रिएको ठाउँबाट सुधारको प्रयास थाल्नुपर्ने बताए । ‘हाम्रो प्रवृत्ति एकले अर्कोलाई दोष दिने भयो । हामी चु्केको ठाउँ जहाँ–जहाँ जसले जुन जिम्मेवारी निर्वाह गर्नुपर्ने हो, त्यो कुराहरु हामीले जिम्मेवारी निर्वाह गरेनौं । त्यहीँबाट सुधार गर्दै जानुपर्छ,’– उनले भने ।
साथै, राजनीतिक दलहरुले पोलिसीमा पनि सुुधार गर्नुपर्ने उनको भनाइ छ । देश संघीयतामा जाँदा पनि २०२८ सालको शिक्षा नीतिले ठूलो उपलब्धी हासिल हुन नसक्नु स्वभाविक रहेको उनको भनाइ छ ।
अहिलेसम्म गणित, विज्ञान, अंग्रेजी र नेपाली विषयको सिकाइ उपलब्धी ५० प्रतिशतभन्दा माथि पुग्नै नसकेको उनले बताए । रिजल्टमा सुधार गर्नका लागि सबैभन्दा पहिला कक्षाकोठाबाटै सुधार थाल्नुपर्ने उनले सुझाए ।
