कृष्णराज गौतम :काठमाडौं २४ चैत । राष्ट्रिय प्रजातन्त्र पार्टीले स्थानीय तहको निर्वाचनमा देशभरका सबै स्थानीय तहमा प्रचारका लागि कार्यक्रम सञ्चालन निर्देशिका तयार गरेको छ।
स्थानीय तह निर्वाचन तयारी कार्ययोजना रहेको सो निर्देशिकामा पार्टी संगठनलाई सुदृढ तुल्याउन विभिन्न तहका कार्यकर्तालाई परिचालन गर्नेबारेमा उल्लेख गरिएको छ।
सर्वसाधारण जनता र राप्रपाबीचको सम्बन्धलाई बढी निकट र आत्मीय तुल्याउनका लागि निर्देशिका प्रकाशन गरिएको पार्टीका नेता राजाराम श्रेष्ठले जानकारी दिए। उनका अनुसार निर्देशिकाले पार्टीको अजेण्डाप्रति आम जनतामा सकारात्मक भावना बढाउन सहयोग पुर्याउनेछ।
त्यसैगरी, मुलुकको वर्तमान अवस्थाबारे आम जनतालाई जागरुक बनाउने विषयमा निर्देशन गरिएको निर्देशिका अनुरुप आगामी स्थानीय चुनावको तयारी देशव्यापी रुपमा सञ्चालन गरिनेछ।
पार्टीद्वारा निर्वाचनलाई लक्ष्य गरेर हालै सञ्चालन भइरहेको ‘जनताको माझमा राप्रपा’ विशेष कार्यक्रममार्फत जनताको घरघरमा पार्टीको वैचारिक सिद्धान्त तथा आदर्शलाई पु¥याइने कार्यक्रम छ।
घरदैलो कार्यक्रममा सबै वडा, गाउँ, नगरभित्रका घरमा पार्टीका कार्यकर्ता पुग्नेछन्। वडा एकाई समितिका सदस्य, भ्रातृ सङ्गठनका सदस्य रहनेगरी वडाको भौगोलिक अवस्था हेरेर एक वा सोभन्दा बढी टोली बनाउन सकिनेछ । पार्टीको बुद्धिजीवि परिषद्ले प्राध्यापक, शिक्षक, पत्रकार, वकिल, चिकित्सक, उद्योगी, व्यापारीलगायतसँग देशको वर्तमान परिस्थिति, विभिन्न समस्या तथा चुनौतीबारे छलफल गरिने युवा नेतृ सरस्वती केसी अधिकारीले बताइन्।
महिला जागरण कार्यक्रमअन्तर्गत पार्टी निकट महिला सङ्गठनले महिला अधिकारबारे देशैभर छलफल गराउनेछ। विद्यार्थी सङ्गठनले युवा, विद्यार्थी उत्सवका रुपमा हाजिरी जवाफ, खेलकुद, सांस्कृतिक कार्यक्रम गरिनेछ।
पार्टीको केन्द्रीय समितिले यो कार्यक्रम सञ्चालन गर्न गराउन आवश्यक सहयोग तथा समन्वय गर्ने नेता किरण गिरीले जानकारी दिए। पार्टीको सन्देश नामक पर्चा तथा प्रसार सामग्री केन्द्रले पठाउने तथा अन्य प्रचार सामग्री जिल्लाले आफैँ तयार गर्नुपर्नेछ।
यी कार्यक्रम सफल पार्न केन्द्रदेखि गाउँसम्मका कार्यकर्ताको मूल्याङ्कन अभिलेख राखिनेछ। केन्द्रले पठाएको मूल्याङ्कन फारम भरी गाउँ÷नगर, क्षेत्र र जिल्ला कार्यसमितिले वैशाखभित्र पठाइसक्नुपर्ने व्यवस्था गरिएको छ।
महानगरपालिका र उपमहानगरपालिकाको उम्मेदवारको छनोट सम्बन्धित तह र सम्बन्धित जिल्ला कार्यसमितिको सिफारिसमा केन्द्रीय कार्यसम्पादन समितिले गर्नेछ। यही चैत २५ गतेभित्र उम्मेदवार छनोट गर्नुपर्नेछ।
