पोखरा, २८ वैशाख । नेपाली काँग्रेसका केन्द्रीय सदस्य डा शेखर कोइरालाले नेपाली जनतालाई समृद्ध बनाउने अभियानमा नेपाली काँग्रेस रहेको बताउनुभएको छ ।
नेपाली काँग्रेसद्वारा पोखरा लेखनाथ महानगरपालिका वडा नं ९ मा आज आयोजित चुनावी सभालाई सम्बोधन गर्दै उहाँले नेपाली जनतालाई सार्वभौम बनाउनका लागि लामो समयदेखि अनवरत सङ्घर्ष गरेको काँग्रेसको अबको अभियान समृद्ध नेपाल बनाउने भएको उल्लेख गर्नुभयो ।
हिमाल, पहाड र मधेसको एकताबाट नै समुन्नत नेपालको परिकल्पना साकार बन्ने औँल्याउँदै उहाँले नेपाली काँग्रेस सबैलाई मिलाएर लैजाने पक्षमा रहेको बताउनुभयो ।
नेपाल ट्रेड युनियन काँग्रेसका पूर्व केन्द्रीय अध्यक्ष लक्ष्मण बस्नेतले नेपाली काँग्रेसको नेतृत्वमा प्रत्येक श्रमिक तथा मजदुर वर्गका साथै विभिन्न वर्ग र समुदायका आवश्यकता पूरा हुने गरेको बताउनुभयो ।
नेपाली काँग्रेसका तर्फबाट पोखरा लेखनाथ महानगरपालिकाका प्रमुख पदका उम्मेदवार रामजी कुँवरले अन्तर्राष्ट्रियस्तरको स्वच्छ हराभरा महानगर निर्माणको योजनालाई साकार पारिने बताउनुभयो ।
उपप्रमुख पदका उम्मेदवार सरस्वती गुरुङले महानगरभित्रका प्रत्येक बस्तीमा विकासको अनुभूति हुने किसिमका कार्ययोजनासहित अघि बढ्ने प्रतिबद्धता व्यक्त गर्नुभयो ।
कार्यक्रममा नेपाली काँग्रेस कास्कीका सभापति कृष्ण केसी, सचिव सुदीपमोहन भट्टराई, वडा अध्यक्ष पदका उम्मेदवार रामराज लामिछानेलगायतले पोखरा लेखनाथलाई स्मार्ट सिटीका रुपमा विकास गर्न काँग्रेसका उम्मेदवारलाई विजयी गराउन आग्रह गर्नुभयो । रासस
