कञ्चनपुर, ३ असार । नेकपा (एमाले) का उपाध्यक्ष एवम् पूर्व उपप्रधानमन्त्री भीम रावलले स्थानीय तहको निर्वाचन किसानलाई असजिलो हुनेगरी गर्न लागिएको बताउनुभएको छ ।
आज कञ्चनपुरको शुक्लाफाँटा नगरपालिकाको झलारीमा आयोजित चुनावी सभालाई सम्बोधन गर्दै उहाँले मध्य–असारको रोपाइँको समयमा किसानले रोपाइँ गर्ने बेला मतदान गर्नुपर्ने भएकाले किसानको अहितमा चुनाव हुन लागेको बताउनुभयो ।
समय समयमा चुनावको मिति सार्दै जानु जनताको अहितमा भएको बताउँदै चुनावका बेला जनतालाई सास्ती, पीडा र समस्या नहोस् भनेर स्वतन्त्रतापूर्वक चुनाव गराउनुपर्ने भएपनि विभिन्न बहाना गरी सरकारले चुनाव सार्दै लगेको उहाँले बताउनुभयो ।
ज्येष्ठ नागरिक, दलित, एकल महिलालाई सामाजिक सुरक्षा भत्ता र दलित बालबालिकालाई छात्रवृत्ति दिने कार्य आफ्नो पार्टीले गरेको दाबी गर्नुभयो ।
कैलाली कञ्चनपुरका भूमिहीनका लागि उच्चस्तरीय सुकुम्बासी आयोग गठन गरी कार्य अगाडि बढाउन खोज्दा विपक्षी राजनीतिक पार्टीले गर्न नदिएको उहाँले आरोप लगाउनुभयो ।
प्रत्येक निर्वाचन क्षेत्रमा सहकारी, साना उद्योग खोल्ने कार्य र सिँचाइको व्यवस्था गरी समृद्ध देश बनाउने कार्य अगाडि बढाउन आफ्नै पार्टीको भूमिका रहेको उहाँको भनाइ थियो । भारतसँग भएको सन् १९५० को सन्धिलाई बदल्न खोज्दा विपक्षीको अड्चनले कार्य अगाडि बढ्न नसकेको उहाँले बताउनुुभयो ।
स्वदेशमा रोजगारी नभएकै कारण देशका ४० लाख युवा मुग्लान जान बाध्य छन् उहाँले भन्नुभयो, “खाडी मुलुकका देशमा ४० डिग्रीभन्दा बढीको चर्को गर्मीमा युवालाई काम गर्न बाध्य पारिनु देशमा रहेका कलकारखाना, उद्योगधन्दा कौडीको भाउमा बेचिँदा यस्तो अवस्था सिर्जना भएको हो ।”
चितवनको भरतपुरमा मतगणना भइरहेका बेला पूर्वप्रधानमन्त्रीको छोरीले चुनाव हार्न लाग्दा मतपत्र च्यात्न लगाएको उहाँले आरोप लगाउनुभयो । उहाँले भन्नुभयो, “मतपत्रको कागज च्यातेको होइन कानुन च्यातेको हो, मतदाताको मन च्यातेको हो ।” रासस
