काठमाडौं, २१ साउन । बलीउड क्षेत्रका चर्चित अभिनेता सुनिल शेट्टी आजभोलि नेपाल भ्रमणमा छन् । गुपचुप नेपालमा भ्रमणमा रहेका सुनिल शेट्टीले शुक्रवार केबलकार चढ्दै चन्द्रागिरिको भ्रमण गरेका छन् ।
अभिनेता शेट्टीलाई चन्द्रागिरि हिल्स लिमिटेडका महाप्रबन्धक अभिषेक विक्रम शाहले परियोजनाको स्थलगत भ्रमण गराएको बुझिएको छ ।
भ्रमणका क्रममा अभिनेता सुनिलले भालेश्वर महादेवको दर्शन गर्नुकासाथै मनोरम दृष्यहरुको अवलोकन गरेका थिए । चन्द्रागिरीको भ्रमण गरेपछि अभिनेता सेट्टीले काठमाडौंको उच्च स्थानमा अत्यन्तै सुन्दर पर्यटकीय गन्तव्यको रुपमा चन्द्रागिरि रहेको प्रतिक्रिया दिएका छन् ।
अभिनेता शेट्टी नेपाल भ्रमणमा आउनुको कारण भने खुलेका छैनन् । सुनिल शेट्टीले फेसबुक, इन्टाग्राम, ट्विटर कतैपनि नेपाल भ्रमणमा रहेको जानकारी दिएका छैनन् । अभिनेता सुनिल शेट्टीको यो पहिलो नेपाल भ्रमण हो ।
