बुटवल, २१ असोज : प्रदेश नं ५ प्रमुख उमाकान्त झाले सनातनदेखि चलिआएको धर्म संस्कृतिको संरक्षण गर्नु सबैको साझा दायित्व रहेको बताए ।
नेपालीको महान् पर्व विजयादशमीको अवसरमा शुभकामना सन्देश दिनुुहुँदै उनले नेपाल बहुजातीय, बहुसंस्कृतिक बिशेषतायुक्त राष्ट्र भएकाले धार्मिक चाडपर्वले नेपालीहरुलाई एक आपसमा सद्भाव र एकताको सुत्रमा बाँध्न महत्वपूर्ण भूमिका खेल्ने बताए ।
प्रदेश प्रमुख झाले धार्मिक तथा सांस्कृतिक सद्भाव र व्यक्ति तथा समुदायबीचको आपसी एकताबाट मात्र राष्ट्रियता मजबुत हुने र यसले नेपालको समृद्धतर्फको यात्रालाई सहज बनाउने हुनाले यसप्रति सबैको ध्यान जानु आवश्यक रहेको बताएका छन् ।
पारिवारिक मेलमिलाप, भातृत्व र स्नेहको पर्व दशैंः मुख्यमन्त्री
यसैगरी हिन्दूको महान् पर्व विजयादशमीको अवसरमा शुभकामना सन्देश दिनहुँदै प्रदेश नं. ५ का मुख्यमन्त्री शंकर पोखरेलले दशैँँ पारिवारिक मेलमिलाप, भातृत्व र स्नेहको पर्व रहेको बताएका छन् ।
नेपाली समाजमा हरेक सांस्कृतिक पर्वले सद्भाव, भातृत्व र मेलमिलाप बढाउनमा ठूलो भूमिका खेल्दै आएको उल्लेख गर्दै उनले दशैँँले अझ आपसी सद्भाव, मेलमिलाप र भातृत्व बढाउन महत्वपूर्ण भूमिका खेलिरहेको बताए ।
मुख्यमन्त्री पोखरेलले भने , “व्यक्ति, परिवार र समाजलाई जोड्ने मौलिक पर्वका रुपमा रहेको दशैँँलाई विकृति र तडकभडकबाट टाढै राखेर मनाउन सक्दा यसको मौलिकता जोगिने र समाज अझै एकताको सुत्रमा बाँधिएर मुलुकको सार्वभौमसत्ता र अखण्डता अझ बलियो हुन्छ ।”
दलको अगुवाइमा समाजको एकताबद्ध प्रयासले जनतालाई रैतीबाट नागरिक बनाएको सङ्घीय लोकतान्त्रिक गणतन्त्रको संस्थागत विकासका लागि सबै नेपाली एक जुट हुनुपर्नेमा जोड दिदैं उनले सङ्घीय लोकतान्त्रिक गणतन्त्रको व्यवहारिक कार्यान्वयनमा सबै लाग्नुपर्ने बताए । रासस
