काठमाडौं, १६ असार । सत्तारुढ दल नेपाल कम्युनिष्ट पार्टी (नेकपा) को स्थायी कमिटीको पाँचौं बैठक बालुवाटारमा जारी छ । आजको बैठकमा शीर्ष नेताहरुले प्रधानमन्त्री तथा पार्टी अध्यक्ष केपी शर्मा ओलीसँग भारतले आफूलाई हटाउन लागेको भनेर दिएको अभिव्यक्तिबारे जवाफ माग गरेका छन् । आजको बैठकमा अर्का अध्यक्ष पुष्पकमल दाहाल, बरिष्ठ नेता झलनाथ खनाल र उपाध्यक्ष वामदेव गौतमले प्रधानमन्त्री ओलीले उक्त अभिव्यक्तिबारे बैठकमा स्पष्ट पार्नुपर्ने माग गरेका छन् ।
गत बुधबारदेखि सुरु भएको नेकपा स्थायी कमिटी बैठकको आज चारऔं दिन हो । यसअघि गत शुक्रबारको बैठकमा ओली अनुपस्थित् भएका थिए भने शनिबारको बैठकमा १५ मिनेटमात्रै सहभागी भएर बाहिरिएका थिए । तर, आजको बैठकमा भने ओली सुरुदेखि नै सहभागी छन् ।
नेकपा स्थायी कमिटी बैठक सुरु, सरकारको कामको समिक्षा हुने
नेकपाभित्र ओली पक्ष र दाहाल र बरिष्ठ नेता माधव कुमार नेपाल पक्षबीच शक्ति संघर्ष सुरु भएको छ । दाहाल–नेपाल समूह स्थायी कमिटीको बैठकमा कडा रुपमा प्रस्तुत भएको छ भने ओली पक्ष रक्षात्मक बनेको छ । स्थायी कमिटीको बैठकमा नै ओलीको राजीनामा माग्नेसम्मको तयारी दाहाल–पक्षले गरिरहेको स्रोतको दाबी छ ।
