काठमाडौं, २० फागुन । प्रधानमन्त्री पुष्पकमल दाहाल ‘प्रचण्ड’ र नेकपा (एमाले) का अध्यक्ष एवं पूर्व प्रधानमन्त्री केपी शर्मा ओलीबीच भेटवार्ता भएको छ । उनीहरुबीच आज (आइतबार) विहान बालुवाटारमा भेटवार्ता भएको हो ।
प्रधानमन्त्री प्रचण्ड र ओलीबीच संक्रमणकालीन न्यायलाई टुङ्गो लगाउने विषयमा छलफल भएको बताइएको छ । पछिल्लो समय प्रधानमन्त्री प्रचण्ड सत्तारुढ गठबन्धन दलबाट सन्तुष्ट छैनन् ।
कांग्रेसले महासमिति बैठकमा माओवादी जनयुद्धबारे अनावश्यक टीकाटिप्पणी गरेको र राष्ट्रिय सभा सदस्य निर्वाचनमा कोशीमा भोट ट्रान्सफर नभएको भन्दै माओवादी असन्तुष्ट छ । साथै, कांग्रेस सभापति शेरबहादुर देउवाले आफ्ना मन्त्रीहरु नचलाउन भनेपछि प्रचण्ड थप विच्किएका छन् ।
एमालेसँग माओवादीको सहकार्य हुने सम्भावनाबारे छलफल भइरहेको अवस्थामा प्रचण्ड–ओलीको भेटवार्तालाई विशेष रुपमा हेरिएको छ । कांग्रेस सभापति देउवाले पनि आज प्रचण्डसँग भेटवार्ता गरेका छन् । प्रचण्डले ओली–देउवासँग छुट्टाछुट्टै भेटवार्ता गरेका हुन् ।
