काठमाडौं,२८ जेठ । गण्डकी प्रदेशका मुख्यमन्त्री सुरेन्द्रराज पाण्डेलाई राष्ट्रिय प्रजातन्त्र पार्टी (राप्रपा) ले विश्वासको मत दिने भएको छ ।
आज बसेको प्रदेश सभाको बैठकमा पाण्डेले विश्वासको मतको प्रस्ताव पेश गरेका थिए । पाण्डेले पेश गरेको प्रस्तावमाथि बोल्दै राप्रपा प्रदेश संसदीय दलका नेता पञ्चराम गुरुङले राप्रपाले विश्वासको मत दिने बताएका हुन् ।
संविधानको धारा १६८ (३) बमोजिम सर्वोच्च अदालतको आदेशबाट गण्डकी प्रदेशको मुख्यमन्त्री नियुक्त भएका पाण्डेले सोमबार विश्वासको मत लिन लागेका हुन् । तर सबैभन्दा ठुलो दलको नेताका हैसियतमा मुख्यमन्त्री बनेका उनले विश्वासको मत पाउन मुस्किल देखिएको छ ।
६० सदस्यीय प्रदेश सभामा पाण्डेले विश्वासको मत प्राप्त गर्न ३१ मत आवश्यक पर्छ । अहिले कांग्रेससँग जम्मा २७ मत रहेका छ । बहुमतका लागि पाण्डेलाई राप्रपासहित स्वतन्त्र एक र नेसपाका सांसदले मत दिनुपर्ने हुन्छ ।
