काठमाडौं,३० जेठ । अध्यादेशमार्फत संवैधानिक निकायमा गरिएको ५२ जनाको नियुक्ति बदर गर्न मागसहित दर्ता भएको रिट निवेदनमाथि सुनुवाइ गर्न सर्वोच्च अदालतको संवैधानिक इजलासमा बुधबार पेशी परेको छ ।
बुधबार सो रिट प्रधानन्यायाधीश विश्वम्भरप्रसाद श्रेष्ठ, वरिष्ठतम् न्यायाधीश प्रकाशमानसिंह राउत, र न्यायाधीशहरु सपना प्रधान मल्ल, कुमार रेग्मी र हरिप्रसाद फुयाल सम्मिलित इजलासमा पेशी तोकिएको छ ।
तत्कालीन प्रधानमन्त्री केपी शर्मा ओलीले संवैधानिक परिषद्सम्बन्धी ऐनमा अध्यादेशमार्फत संशोधन गरी विभिन्न संवैधानिक निकायमा नियुक्ति गरेका ५२ जना पदाधिकारी तथा सदस्यहरूको नियुक्ति बदरको माग गर्दै रिट परेको थियो ।
अधिवक्ता ओमप्रकाश अर्याल, वरिष्ठ अधिवक्ता डा दिनेश त्रिपाठी लगायतले दायर गरेको रिटमा यसअघि २०७८ चैत ९ गते कारण देखाऊ आदेश जारी भएको थियो भने २०७९ असार ८ गतेको आदेशमा सबै मुद्दालाई लगाउमा राख्ने र सबै विपक्षीलाई जानकारी दिने आदेश भएको थियो ।
मुद्दामा संवैधानिक नियुक्ति लिएका ५२ जना, राष्ट्रपति कार्यालय, प्रधानमन्त्री तथा मन्त्रीपरिषद्को कार्यालय, संवैधानिक परिषद्का सदस्य आदिलाई विपक्षी बनाइएको छ ।
सो मुद्दामा पेशी तोकिएपनि आज पनि सुनुवाई हुने सम्भावना भने ज्यादै न्यून छ । रिटको पेशी २१औं नम्बरमा परेको र सर्वोच्चमा आज फुटकोर्ट बैठक पनि रहेको हुँदा सुनुवाइ नहुने लगभग निश्चित जस्तै छ ।
