चोरीको गहना बिक्री गर्ने बिषयमा बिवाद हुँदा दैलेखमा ११ वर्षीय बालकको हत्या, दुई जना किशोर पक्राउ

काठमाडौं । दैलेखमा ११ वर्षीय बालकको हत्या गरेको अभियोगमा दुई जना बालक पक्राउ परेका छन्।

दुल्लु नगरपालिकाका ती बालकको हत्या अभियोगका सोही ठाउँका १४ वर्षीय र १७ वर्षीय किशोरलाई दैलेख प्रहरीले नियन्त्रणमा लिएको हो ।

दुल्लु नगरपालिका–५ घर भएका शमबहादुर दशौंदीका ११ वर्षीय छोरा खेमराज दशौंदीको हत्या गरिएको अवस्थामा शनिबार शव भेटिएको थियो ।

गत माघ २५ गते हराएका ति बालकको शव आफ्नै साथीहरुले हत्या गरेर गाडेको अवस्थामा शनिबार प्रहरीले फेला पारेको हो।

सँगैका साथीले हत्या गरेर बालकको शव घर नजिकै रहेको बाँसघारीमा गाँडेको अवस्थामा बरामद गरिएको प्रहरीले जनाएको छ।

प्रहरीका अनुसार चोरी गरेर ल्याएको सुनको गहना (तिलहरी) बिक्री गर्ने बिषयमा बिवाद हुँदा ती बालकलाई आफ्नौ साथीले माघ २५ गते राति नै हत्या गरेर घर नजिकै रहेको खोलामा खाल्डो खनी गाडेका थिए।