विद्यार्थीको गालामा तातो पनिउँले डाम्ने शिक्षिकालाई थप पाँच दिन हिरासतमा राखेर अनुसन्धान गर्न अनुमति

काठमाडौं, ६ फागुन । विद्यार्थीको गालामा तातो पनिउँले डामेर यातना दिएपछि पक्राउ परेकी शिक्षिका सुष्मा श्रेष्ठलाई थप ५ दिन हिरासतमा राखेर अनुसन्धान गर्न अदालतले अनुमति दिएको छ । तनहुँको भीमाद–६ स्थित प्रभात एकेडेमीकी शिक्षिका तीन जना विद्यार्थीलाई पनिउँले डामेर यातना दिएको घटना सार्वजनिक भएपछि उनलाई पक्राउ गरिएको थियो ।

पहिलो पटक तनहुँ जिल्ला अदालतले उनलाई ५ दिन हिरासतमा राखेर अनुसन्धान गर्न अनुमति दिएको थियो । पहिलो पटक पाएको अनुमतिको अवधि सकिएसँग पुनः दोस्रो पटक म्याद थप गरिएको हो ।

उनीमाथि बालबालिकाविरुद्धको कसुरमा अनुसन्धान भइरहेको बताइएको छ । ती शिक्षिका सोही विद्यालय सञ्चालक कृष्ण श्रेष्ठकी छोरी हुन् । विद्यार्थीलाई अनुशासनको नाममा उनले यस्तो प्रकारको हर्कत गरेको पाइएपछि चौतर्फी आलोचना भइरहेको छ ।