प्रधानमन्त्री ओलीलाई ‘संविधान र कानुन मिच्ने उस्ताद’ को संज्ञा दिँदै माधवले भने, ‘अध्यादेश राम्रो उद्देश्यले ल्याएको होला भन्ने आशा गर्न सकिँदैन’

काठमाडौं, १६ फागुन । नेकपा (एकीकृत समाजवादी) का अध्यक्ष माधवकुमार नेपालले प्रधानमन्त्री केपी शर्मा ओलीले राम्रो उद्देश्य राखेर अध्यादेश ल्याए होलान् भन्ने कुराको अनुमान गर्न नसकिने बताएका छन् । आज (शुक्रबार) अध्यादेशबारे छलफल गर्न जनता समाजवादी पार्टी (जसपा) नेपालले आयोजना गरेको अन्तरक्रिया कार्यक्रमलाई सम्बोधन गर्दै उनले प्रधानमन्त्री ओलकिो पृष्ठभूमि नै खराब रहेको बताएका हुन् । ओलीले अघिल्लो पटक प्रधानमनत्री हरेको बेलामा अदालतको आदेशसमेतलाई बेवास्ता गरेर दोस्रो पटक पनि संसद् विघटन गरेको बताए ।

‘संविधानमा हुँदैनभएको प्रावधान प्रयोग गरेर उहाँले प्रतिनिधि सभा विघटन गरेको इतिहास पुरानो भएको छैन । उहाँलाई मन लाग्यो भंग गरिदिनुभयो, चुनावको मिति घोषणा गरिदिनुभयो । अदालतले बेठीक भनिदियो । तैपनि उहाँले टेर्नुभएन । फेरि पनि दोस्रो पटक गर्नुभयो । त्यस्तो किसिमको पृष्ठभूमि बोकेका प्रधानमन्त्रीबाट राम्रो उद्देश्य राखेर राम्रो काम गरिएको होला भन्ने कुराको आशा गर्न सकिँदैन,’– उनले भने ।

अध्यक्ष नेपालले प्रधानमन्त्री ओलीलाई ‘संविधान र कानुन मिच्ने उस्ताद’ को संज्ञा दिए । उनले प्रधानमन्त्री ओलीले संविधान र कानुन मिच्दा आफूप्रति गौरवबोध गर्ने गरेको टिप्पणी गरे । ‘कानुनको सम्मान गरिएन भने त्यसले देशको विधिको शासनमाथि प्रहार गर्छ । अहिलेका हाम्रा प्रधानमन्त्रीजी संविधान मिच्ने र मिचेर चल्ने कुराको उस्ताद हुनुहुन्छ । त्यो गर्ने कुराप्रति गौरवबोध गर्नुहुन्छ । उहाँलाई संविधान, कानुन, विधिसँग मतलब छैन,’– उनले भने । File Photo/RN