माधवको टिप्पणीः कस्तो मित्र पाएँ भनेर प्रचण्ड मख्ख पर्नुभएको थियो, ओलीले नर्क पो पुर्याइदिनु भयो !

काठमाडौं, १६ फागुन । नेकपा (एकीकृत समाजवादी) का अध्यक्ष माधव कुमार नेपालले प्रधानमन्त्री केपी शर्मा ओलीले पुष्पकमल दाहाल ‘प्रचण्ड’ लाई धोका दिएको बताएका छन् । आज (शुक्रबार) अध्यादेशबारे छलफल गर्न जनता समाजवादी पार्टी (जसपा) नेपालले आयोजना गरेको अन्तरक्रिया कार्यक्रमलाई सम्बोधन गर्दै उनले स्वर्ग–नर्क सँगै जाने वाचा गरेका ओलीले प्रचण्डलाई मात्रै नर्क पुर्याइदिएको टिप्पणी गरेका हुन् ।

‘यो सरकार बनाउँदाखेरी पनि त्यस्तै भयो । त्यो राति उहाँ माओवादीका अध्यक्ष प्रचण्डलाई भन्दै हुनुहुन्थ्यो– तपाईँ र म यो जिन्दगी रहुन्जेलसम्म संगसँगै जाने हो । स्वर्ग पनि संगै जाने, नर्क पनि संगै जाने । तपाईँ र हाम्रो साथ कहिल्यै छु्ट्दैन, टुट्दैन । प्रचण्डजी पनि मख्ख पर्नुभयो । कस्तो मित्र पाएछु । संगै स्वर्ग जाने, परिहाल्यो भने संगै नर्क पनि जाने । आनन्दले राति सुत्नुभएछ । विहान नर्क पो पुगिएछ । यस्तो पृष्ठभूमि भएको व्यक्तिले ल्याएको कुरा शंकाको घेरामा हुन्छ,’– उनले भने ।

अध्यादेश ल्याउने सरकारको तरिका र त्यसभित्रको अन्तरवस्तु दुवै बेठीक रहेको अध्यक्ष नेपालको दाबी छ ।