भ्रष्टाचारी जिल्ला सभापतिलाई बर्खास्त गर्न माग गर्दै कांग्रेस केन्द्रीय कार्यालयमा प्रदर्शन

काठमाडौं, १० चैत । नेपाली कांग्रेस सर्लाहीका जिल्ला सभापतिलाई बर्खास्त गर्न माग गर्दै केन्द्रीय कार्यालय सानेपामा प्रदर्शन भएको छ । आज (आइतबार) कांग्रेस सर्लाहीका उपसभापति, क्षेत्रीय सभापति, सचिवलगायतले प्रदर्शन गरेका हुन् । कांग्रेस सर्लाहीका जिल्ला सभापति सुरेन्द्र प्रसाद सिंह भ्रष्टाचार मुद्दामा सर्वोच्च अदालतबाट दोषी प्रमाणित भइसकेका छन् ।

जिल्लाका नेताहरुले सुरेन्द्रलाई बर्खास्त गर्न माग गर्दै विगतमा पनि पार्टी सभापति शेरबहादुर देउवालगायतका नेताहरुलाई निवेदन दिएका थिए । पटक–पटक ताकेता गर्दा पनि सुरेन्द्रलाई कारबाही नभएपछि उनीहरु केन्द्रीय कार्यसम्पादन समितिको बैठक बस्नुअघि प्रदर्शनमा उत्रिएका छन् । सर्लाही जिल्ला सभापति सुरेन्द्रलाई महामन्त्री गगनकुमार थापाको संरक्षण रहेको बताइन्छ ।